PH ipadadala ang pinakamalaking delegasyon sa 2025 SEAG

IPADADALA ng Pilipinas ang pinakamalaking delegasyon nito sa kasaysayan sa 2025 SEA Games sa Thailand.

Sinabi ni Abraham “Bambol” Tolentino, presidente ng Philippine Olympic Committee, na higit sa 1,600 na delegado ang pupunta sa Thailand, na mas mataas kaysa sa 1,115 na bilang noong host ang Pilipinas ng biennial meet noong 2019.

“This is the biggest delegation that we will ever send in the Southeast Asian Games, and all eyes are set to finish with a medal and bring honor and pride to the nation,” Wika ni Tolentino sa send-off sa Rizal Memorial Coliseum sa Malate, Manila.

Batid na magpapadala rin ng malalaking delegasyon ang Thailand at Indonesia, ipinahayag ni Tolentino ang tiwala sa kakayahan ng mga Pilipino na malampasan ang kanilang mga karibal.

Sa edisyon ng 2023, nagpadala lamang ang Pilipinas ng 840 na atleta sa Cambodia, kung saan nakamit ng koponan ang 58 gintong medalya, 85 pilak, at 117 tanso.

Samantala, ang mga Pilipinong atleta ay nakatakdang magkaroon ng karagdagang motibasyon sa pakikipagkompetensya matapos sabihin ni Pato Gregorio, chairman ng Philippine Sports Commission (PSC), na magbibigay ang ahensya ng palakasan ng kabuuang P24,000 na bonus para sa mga atleta at coach na lalahok sa biennial meet.

Ang nationals ay makatatanggap ng dagdag na P6,000 na allowance at P18,000 na Christmas bonus.