PAGKILALA AT SUPORTA SA MGA GURO, ‘DI DAPAT PANGAKO LANG

MAHALAGA at napapanahon ang pagkilala ni Pangulong Ferdinand Marcos Jr. sa mga bagong na-promote na guro at school heads ng DepEd NCR.

Sa araw-araw na pagtuturo, malinaw na hindi lang aralin ang ibinibigay ng mga guro, kundi oras, malasakit, at gabay na humuhubog sa pagkatao ng kabataan.

Madalas, lampas pa ito sa oras ng klase at hindi nasusukat ng simpleng sahod o titulo.

Totoo ang sinabi ng Pangulo na mabigat ang tungkulin ng mga guro. Sila ang unang nagtatanim ng disiplina, katapatan, at malasakit sa susunod na henerasyon. Kung nais nating umunlad ang bansa, dapat magsimula ito sa matibay na pundasyon ng edukasyon at nasa kamay ito ng mga nasa silid-aralan.

Magandang hakbang ang mga programang binanggit tulad ng career progression, dagdag na benepisyo, at mas malaking pondo para sa sektor ng edukasyon.

Ngunit mas mahalaga na maramdaman ito sa aktwal: mas magaang na workload, sapat na pasilidad, at tuloy-tuloy na pagtaas ng kakayahan at kabuhayan ng mga guro.

Importante ang pagkilala, pero mas mahalaga ang tuloy-tuloy at konkretong suporta.

Dahil kapag matatag ang guro, mas matatag ang kinabukasan ng bayan.

PAMUMUHUNAN SA HEALTH EDUCATION, PAMUMUHUNAN SA BUHAY

Ang groundbreaking ng PLM College of Allied Health Services ay isang malinaw na hakbang tungo sa pagpapalakas ng sektor ng kalusugan sa bansa.

Sa kakulangan ng mga doktor, nurse, at iba pang health professionals, mahalagang palawakin ang access sa de-kalidad na edukasyong medikal, lalo na para sa mga estudyanteng kapos-palad.

Hindi sapat na dagdagan lamang ang mga ospital at pasilidad. Dapat ding paramihin at paghusayin ang mga taong maglilingkod dito. Ang pamumuhunan sa pagsasanay at modernong pasilidad para sa mga mag-aaral ng allied health ay direktang pamumuhunan sa kaligtasan at kapakanan ng mamamayan.

Kung magtutuloy-tuloy ang ganitong proyekto, mas magiging handa ang susunod na henerasyon ng healthcare workers na tumugon sa pangangailangan ng bayan.

Ang edukasyon sa kalusugan ay hindi gastos — ito ay pangmatagalang puhunan.

***

Catch Gilbert Perdez’s “Barangay 882” radio show every Saturday from 4:00 PM to 5:00 PM. Tune in via ALIW Channel 23, DWIZ AM Radio, DWIZ 882 Facebook page, or DWIZ ON-DEMAND on YouTube. You can contact him via email at gil.playwright@gmail.com or through this number: 0991-3543676.