APILA SA MERALCO

Labis ang init ng panahon sa ngayon na ‘di malaman saan maghahanap ng may kalamigang lugar na titigilan. Sa totoo lang, paboritong puntahan ng mga Pinoy ang mall at silip ang maraming naghuhuntahan sa gilid, sa liwasan at upuang inilaan. Samantala, makikita ang mga naglalakad na tila namimili ngunit kapagkaraka’y lalabas ng may ngiti dahil naasikaso sa pagtatanong sa ibig bilhin na lalabas na dahil ‘di naibigan ang ipinakitang produkto. Habang ang iba’y nagkakasya sa pa-tingin tingin sa mga nakatanghal na produkto at kung nagsawa’y lilipat sa ibang tindahan, ang tinatawag na “window shopping”. Maghapon ang kalakarang banggit sa mga mall upang makadama ng lamig sa maghapong napakaalinsangang panahon.

Sa napaka-init na panahon, pumasok sa isip ang pagkasira ng kalikasan o ng mundo dahil sa kasakiman ng iilan. Sa bansa, silip ang pagkasira ng mga kabundukan na pinuputol ang mga puno, pinapatag ang kabundukan upang magkamal ng salapi. Sa likod ng pagkasira ng kaayusan ng pagkakalikha ng mundo, ang nakakarami ang pumapasan sa kasakiman ng iilan. Sa kabilang dako, labis ang pagdami ng tao na isa sa dahilan sa pagtaas ng temperatura ng mundo. Ang dumaraming tao na naninirahan sa ‘di lumalaking mundo ang labis na nagpapainit sa panahon. Habang sa ibang panig ng mundo, ‘di mawari ang napakalamig na panahon na nanunuot sa kalamnan na dahilan sa maraming paglalayag sa iba’t ibang lugar na kabila ang klimang dinaranas. Saan pupunta, ang tao sa nagaganap na pagpapalit ng klima ng mundo. Mamamayan ng mundo, mag-isip isip hinggil sa kagalingan ng mundong tirahan dahil kawalan ang kalalabasan sakaling sumabog ng mundong tinitigilan.

Walang ibang magmamahal sa mundo kundi ang tao, napakalaking usapin higit sa ilang mga lahi na ang ibig maghari. Sa ilang namumuno sa mga bansa, alang paki-alam kung masira ang ilang bahagi ng mundo o maubos ang ibang lahi. Ang mahalaga’y masunod ang ibig, ang maging pangunahing lahi sa mundo na susi sa pagkasira ng mundo. Ang galawang kami, sa amin ang silip na layon ng ilang malalakas na bansa o lahi. O sa madaling salita, matira ang matibay. At sa maliitang kaganapan sa bawat bansa, silip ang pagkakatulad sa galaw ng malalakas na bansa na ipinapakita ang lakas ng yumuko ang nakakarami.

Mainam na silipin ang larawan ng pagmamalabis sa bansang pinakamamahal, ang Pilipinas. Silip at dama ni Mang Juan na patuloy na paghihirap sa buhay na ‘di nagmula sa loob ng pamilya at galing sa labas. Hindi mawari ni Mang Juan kung bakit kinakapos sa maraming pangangailangan gayung ‘di dumadami ang bilang sa pamilya. Oo’ nariyan ang giyera sa ibang bahagi ng mundo ngunit at bakit labis labis ang pagtaas ng presyo ng mga bilihin. Ganap na hindi nakapaghanda ang pamahalaan sa kaganapan sa ibang bansa na ganap na pasanin sa pagtaas ng presyo ng bilihin, bayarin na si Mang Juan ang papasan. At sa totoo lang, hindi masawata ang labis na pagnanakaw sa pamahalaan na minsang binanggit ng pangulo ng bansa ngunit nauna pa ang pagong sa dulo ng karera. Walang napapanagot puro banta ang naririnig sa mga opisyal ng pamahalaan habang pabigat ng pabigat ang kabuhayan ng mamamayan. Bigyan ng espasyo sa puso si Mang Juan na patuloy na nagdurusa sa mahal ng mga tustusin sa araw – araw.

Ang kaguluhan sa mundo, sa bansa, sa pamahalaan at maging sa pribadong grupo’y ganap na pumasok sa mga tahanan ng tulad ni Mang Juan. Tulala si Mang Juan sa kaganapan na ‘di mawari kung bakit nadagdagan ang pasanin sa ‘di nagbabagong paggamit ng kuryente. Sa nasilip na bayarin sa paggamit ng kuryente, uulitin natulala si Mang Juan kung bakit nagdoble ang halaga ng bayarin sa parehong paggamit at ginagamit na kasangkapan sa bahay. Tunay na mainit ang panahon subalit mas-uminit ang ulo ni Mang Juan sa pagtaas ng bayarin sa kuryente ng matanggap ang buwanan talang bayarin. Nairita’t ipinatawag ang mga anak sa labis na pagtaas ng bayarin. Pinagpaliwanag ang bawat kasapi ng pamilya kung may labis sa paggamit ng mga kasangkapan gamit ang kuryente. Walang nakaimik, ng sinilip ang tala sa listahan ng mga nakapaloob na bayarin, maraming tala na ‘di mawari kung bakit sila ang aako na ‘di dapat. Bakit kami ang magbabayad, tanong ni Mang Juan sa MERALCO?

Sa usapin ng bayarin sa pagkunsumo sa kuryente, nasilip ang ilang bahagi ng “EPIRA Law” na maaring ipasa sa mga kumukonsumo ang ilang bayarin ng kumpanya. Batas na gawa ng mga halal ng bayan na si Mang Juan ang pumapasan sa bayarin na dapat ang MERALCO ang aako. Sa pagsasaliksik sa kalagayan ng kaperahan ng MERALCO, kapansin pansin ang napakalaking kinita sa mga nakalipas na taon at sa huling taon bago ang kasalukuyan, natulala sa P51B kinita ng MERALCO na nagmula sa mga tulad ni Mang Juan na nagpatigil sa pagpapa-aral dahil ‘di kaya ang mga tustusin. Pinatigil sa pag-aaral ang anak, nagbawas sa pagkain ng pag-isahin ang almusal at tanghalian ng makatipid. Habang bilyon bilyon ang kinikita ng MERALCO, mahiya kayo kay Mang Juan na pinatigil ng anak sa pag-aaral.

Tuwiran, sa huling tanggap ng bayarin sa MERALCO, nakakagalit, nagdalawang ulit ang laki ng bayarin sa kuryente gayung walang naidagdag na kasangkapan sa parehong paggamit. Sa pagsasaliksik muli, ipinasa kay Mang Juan ang mga bayarin ng mga kumukunsumo ng mababa sa P2,000.00, bilang bahagi kuno ng 4Ps na tulong sa pamahalaan ngunit pabigat sa tulad ni Mang Juan. Tanong, ‘bakit ‘di akuin ng MERALCO at ng pamahalaan ang bayaring banggit at kailangan si Mang Juan muli ang bumalikat sa bayarin. Maawa kayo sa karaniwang tao, ibsan ang bigat ng pasanin ng tustusin. Silip sa bansa ang pagiging marahas ng ilang kababayan na itinataya ang sarili sa maliit na halaga. Habang ang mga duhapa na kagalang galang kuno ay namumunini sa katas ng pawis at dugo ng mga taong naghihirap.

Sa MERALCO, umaapela na magparaya sa ilang bayarin ni Mang Juan ng maipagpatuloy ang pagpapa-aral ng mga anak na may ibig maabot. Hindi masama ang mabawasan ang bilyong kita na ‘di maisasama sa huling hantungan. Mabigat na ang pasanin ni Mang Juan, panahon na upang madama ang pagmamahal ng MERALCO, ni MVP sa taong nahihirapan sa bayaring ipinapasa. At sa pamahalaan, magbalangkas ng tamang programa na makakagaang sa pasanin ni Mang Juan at nang maging patas ang pagpaparaya na gagawin ng kumpanya ng kuryente sa pagpapagaan sa pasanin ni Mang Juan at tulad niya.

Maraming salamat po!!!!