Willie nagbenta ng kotse para itulong sa mga nasalanta ng bagyo

Ni GERRY OCAMPO

NAGBENTA si Willie Revillame  ng isa  sa kanyang mga kotse  para gamitin ang pera  sa pagtulong sa mga kababayan  natin nasalanta ng bagyong Rolly at Ulysses.

Last  Friday,  (November 13),  isang  special  na episode para  sa  mga  nasalanta  ng  bagyo  ang  napanood  sa kanyang  show na Wowowin.

Nagbigay  ng  update  si Willie  sa  mga  nasalanta  ng bagyo  nang makausap  niya si Montalban, Rizal  Mayor Dennis  Hernandez at  si Mayor Marcy Teodoro ng Marikina. Sa kanyang show din  ay inihayag  niya ang paghahangad  na tumulong sa abot ng kanyang  makakaya.

Ibinenta  ng  Wowowin host  ang  kanyang  kotse sa halagang P7 million  na  ginamit  niyang  pagtulong  sa  dalawang bayan na nasalanta ng bagyo.

“Bale  ho  P7 million, dadagdagan  ko  ho  yun ng kaunting  naipon ko.  Magbibigay  po ako  sa  Montalban  ng P5 million  at  another  P5 million  po  sa  Marikina. Aanhin  ko  ho  yung kotse  kung  marami  akong  kababayan  na  naghihirap?

“Kahit  magbenta  pa ako ng kahit anong  pag-aari, pag-aari  mo na hindi  mo  na  kailangan. I  think  this is  the  right  time,” say ni Willie.

Gusto  lang  linawin  ni  Willie na  ipinaabot niya ang kanyang personal  na tulong  hindi  para  magyabang kundi para  magkaroon  ng  accountability  sa  mga  tao  na dapat  talaga  makatanggap  ng kanyang  tulong.

“Kaya   ko  `to  sinasabi  ho  dahil  ito  yung  totoong  nararamdaman  ko.  Sabi  nila bakit  kailangan  ko  pang  ipakita  sa TV o ano.  Kailangan  ko  hong  malaman  n`yo  para  malaman  ng mga  kababayan  n`yo  na  may  perang  inilaan  para  sa inyo  at  yun  po ay para  sa inyo.

“Nandito  po  kami, nandito  po  ako. Hindi  ko kailangan  ng posisyon. Kailangan  ko ho ng  pagmamahal   para  sa inyo. Ipagdasal  n`yo  lang  ho  ako  na  sana tumagal  pa  ang  programang  ito  para  mas  marami  po  kaming  matulungan.”