Ilang stars sanib-pwersa sa pagtulong sa mga nasalanta ng bagyo

Ni GERRY OCAMPO

KUMILOS agad ang ilang artista para tulungan ang mga kababayan nating  nasalanta ng bagyong Ulysses.

Una na si Willie Revillame na nagbenta  ng kanyang sasakyan  para   pantulong  sa  mga nasalanta sa Marikina at Rodriguez, Rizal.

Si  KC  Concepcion naman ay nagbenta ng kanyang  mga necklace and ring na siya mismo ang nag-design.

Kung si Willie ay sasakyan at alahas naman si KC,  si Heart Evangelista  naman  ay  isinubasta ang kanyang  mamahaling damit.

Ipinost ni Heart ang kanyang Filipiniana dress sa IG na gawa ng isang sikat  na designer. Kaagad namang nabili ang nasabing damit  kaya inaabangan ngayon ng mga netizen ang iba pang designer pieces na isusubasta ng actress.

Ginamit  naman ni Alden Richards ang kanyang AR Streaming para makalikom  ng pera  na   gagamiting  pantulong sa mga nasalanta ng bagyong Ulysses.

Umabot  na sa ngayon  sa USD 4, 624  na sa pera natin ay katumbas ng P222, 559  na donasyong ibinigay sa kanya.

“Maraming  salamat  sa  lahat  ng  nag-donate. Patuloy  po tayong tumulong  sa abot  ng  ating makakaya  para  sa  nasalanta  ng bagyo. God  bless  and keep safe,” tweet ni Alden kalakip  ng screenshot ng total  amount  ng donasyon.

Ang  couple  naman  na sina Rocco Nacino  at  volleyball  player na si  Melissa Gohing ay namahagi  ng  relief goods  at damit sa Rodriguez at Montalban, Rizal.