Jean tinawag na walang respeto ang ex-manugang na si Alwyn

Ni GERRY OCAMPO

HANGGANG ngayon patuloy pa rin ang paghingi ng tawad ni Alwyn Uytingco  sa  estranged  wife na si Jennica Garcia.

Makikita nga sa kanyang Instagram page ang sunud-sunod na pagsisisi niya at paghingi ng tawad para maituwid at maitama ang kanyang kamalian.

Sa latest post ni Alwyn ay nag-upload  siya ng throwback photos ng masasayang araw nila ni Jennica. Sa caption ay inihayag niya ang pagmamahal kay Jennica at nagmamakaawa na bigyan pa siya ng isa pang pagkakataon.

“Mahal  kita, @jennicauytingco. Sorry sa lahat ng pagkukulang ko. Patawad  sa  lahat  ng pagkakamali  ko. Di mahalaga kung  ano ang sabihin nila…ang mahalaga para sa akin ay mga salita na manggagaling sayo. Natalisod  man ako, hindi  ko  hahayaan  na nandito lang ako. Babangon  ako, mahal. At patuloy na babagtas  patungo sayo. Mahal na mahal  kita.”

Sa panayam ng GMA 7 ay kinumpirma ni Jennica na hiwalay na sila  ni Alwyn. Wala nga lang binigay na detalye ang anak ni Jean Garcia kung bakit sila naghiwalay.

Magmula noon ay panay ang post ni Alwyn ng paghingi ng tawad pero dedma na si Jennica  sa post ng actor. Ang hindi nakapagpigil sa panay na post ni Alwyn ay ang ina niyang si Jean Garcia.

Sunud-sunod din ang post ni Jean sa post ni Alwyn at  tila asar na asar na ito sa manugang.

“Talaga ba yan Alwyn?!!! Sana  sinagot  mo  message  ko sayo…respeto  kasi  yon  bilang magulang ni Jennica. Kausapin mo kaya ako para magkaintindihan tayo!  Ok  ka lang ba?! Comment ni Jean  sa isang post ni Alwyn.

Hindi pa rin nagpaawat ang actress at nag-iwan din ng comment sa  birthday message  ni Alwyn  sa  anak  na si  Alessi.

“Hayyy  kawawa  kasi  ikaw, di  ka marunong makipag-usap. Alwyn, respeto  lang  hinihingi  ko  sayo, di  ka marunong  rumespeto sa mother  in  law  mo…yun  lang naman…just  saying!!!” comment ni Jean.

Yean 2014 nang ikasal sina Jennica at Alwyn, biniyayaan sila ng dalawang anak na babae na sina  Mori  at  Alessi.

***

Welcome sa Bubble Gang barkada ang mga bagong Kapuso

Masaya ang Bubble Gang barkada sa mga bagong Kapuso talent na nagpahayag na gusto nilang mag-guest sa longest running gag show sa telebisyon na napapanood every Friday at 10:12 pm sa GMA 7.

Matatandaang matapos pumirma ng kontrata ni Beauty Gonzales sa GMA 7 ay nagpahayag ito na gusto niyang lumabas sa Bubble Gang dahil isa ito sa mga paborito niyang gag show sa Kapuso Network.

Sa interview nga kay Beauty ay inamin nito na paborito niya si Michael V pagdating sa pagpapatawa. Kaya looking forward siya na ngayong isa na siyang Kapuso ay makakasama niya si Bitoy.