May punto si Lacson, dapat kalihim ng DOF ang mangasiwa sa PhilHealth

Iginiit ni Presidential aspirant Senator Panfilo Ping Lacson na dapat ang kalihim ng Department of Finance (DOF) ang mamuno sa PhilHealth sa halip na kalihim ng Department of Health (DOH).

Pahayag ito ni Lacson sa harap ng planong PhilHealth holiday ng mga ospital mula Enero 1 hanggang 5 sa susunod na taon bilang protesta sa kabiguan ng PhilHealth na bayaran ang claims ng mga ospital.

Madaming mali na nakikita si Lacson sa PhilHealth, tulad ng pamumuno dito ng isang health practitioner, dating law enforcer o kaya ay retired general.

Dismayado din si Lacson na hanggang ngayon ay nakabinbin pa rin Ombudsman at Sandiganbayan ang mga kasong kriminal at administratibo na inihain laban sa mga matataas na opisyal ng PhilHealth.

Diin ni Lacson, ang mabagal na usad ng mga kaso ang isa sa mga dahilan kaya hindi matuldukan ang katiwalian sa PhilHealth.

Ayon kay Lacson, dalawang taon na ng maisampa ng Department of Justice (DOJ) ang nabanggit na mga kaso na bunga ng imbestigasyon ng Senado.

Paliwanag ni Lacson, ginawa na ng Senado ang parte nito para makatulong na maresolba ang katiwalian sa PhilHealth kaya sana ay kumulos din ang mga kinauukulang sangay ng gobyerno para maisaayos ang PhilHealth.

@@@

Samantala ikinalungkot din ni Senator Sonny Angara na maituturing ang Philippine Health Insurance Corporation (PhilHealth) ngayon na weak link o mahinang bahagi ng ating health system.

Pahayag ito ni Angara sa harap ng planong PhilHealth holiday ng mga ospital mula January 1 hanggang 5 sa susunod na taon bilang protesta sa kabiguan ng PhilHealth na bayaran ang kanilang claims.

Giit ni Angara sa PhilHealth, repasuhin ang reimbursement procedures nito para mabayaran ang mga ospital.

Mungkahi ni Angara sa PhilHealth, kumuha ng finance professionals at mga actuaries and management experts.

Diin ni Angara, mahalaga ang maayos na pangangasiwa sa pananalapi ng PhilHealth dahil nakasalalay dito ang epektibong implementasyon ng Universal Health Care Law.

@@@

Para sa inyong mga suhestyon, reaksyon at opinyon mag-email lang sa balyador69@gmail.com.
Ugaliing makinig sa programang “BALYADOR” at “WALANG PERSONALAN TRABAHO LANG” mula lunes hanggang linggo 11:00am-12:00noon sa RADYO NG MASA entertainment net radio. tuwing sabado at linggo 12:00nn-12:30pm sa DWBL 1242 kHz am band, tuwing martes 9:30am RADYO NATIN 105.3 FM Pinamalayan at 10:00am RADYO NATIN 102.9 FM Victoria, tuwing huwebes 9:00-10:00am sa 96.9 FM RADYO NATIN Calapan City. Mapapanood livestreaming at Youtube live!