Pagtinta ni PRRD sa mga bagong batas na magpapahusay sa public education, pinuri ni Sen. Go

PINURI ni Senator Christopher “Bong” Go si Pangulong Rodrigo Duterte sa paglagda ng mga bagong batas para mapabuti ang sistema ng edukasyon sa bansa sa gitna ng iba’t ibang hamon na kinakaharap ng mga Pilipino, lalo ng mga kabataang mahihirap.

Kabilang dito ang Republic Act No. 11650 na nagtatatag ng mga serbisyo at programa para sa mga mag-aaral na may mga kapansanan bilang suporta sa inclusive education at walong bagong batas ng paaralan na naghihiwalay at nagko-convert ng extension o annexed na mga paaralan sa mga independiyenteng pambansang paaralan.

“Ang edukasyon ay isang karapatan na nakasaad sa Konstitusyon na dapat protektahan at itaguyod ng Estado. Kaya, ang pagtiyak sa edukasyon para sa lahat ay dapat maging pangunahing prayoridad,” diin ni Go.

Para ito ay makamit, sinabi ni Go na napakahalaga na ang mga pagkakataong matuto at makatanggap ng dekalidad na edukasyon ay mapupuntahan ng lahat ng nagnanais.

Ang RA 11650 na co-authored ni Go, ay layong pahusayin ang kalidad ng edukasyon sa sektor ng pormal na pag-aaral sa pamamagitan ng pagbibigay ng mga libreng serbisyong pangsuporta pati na rin ang mga programang naaayon sa mga pangangailangan ng differently-abled learners.

Ipinag-uutos nito ang pagpapatupad ng isang Child Find System, isang pamamaraan para sa paghahanap sa mga mag-aaral na may mga kapansanan na hindi nakatanggap ng mga serbisyo sa pangunahing edukasyon, at pinapadali ang kanilang pagsasama sa pangkalahatang sistema ng edukasyon.

Ang mga programa at serbisyo sa ilalim ng panukala ay ihahatid sa pamamagitan ng Inclusive Learning Resource Centers (ILRC) na itatatag sa bawat munisipalidad at lungsod.

Bawat ILRC ay bibigyan ng kawani ng mga gurong may espesyal na pagsasanay, mga aide ng guro, mga lisensyadong social worker at iba pang kaalyadong propesyonal na sinanay na makipag-ugnayan at turuan ang mga mag-aaral na may mga kapansanan.

Inaatasan din ng batas ang mga paaralan, mga sentro ng pagpapaunlad ng bata at mga ILRC na bumuo ng mga indibidwal na plano sa edukasyon upang matugunan ang mga natatanging pangangailangang pang-edukasyon ng bawat mag-aaral.

Naghain din ang senador ng SBN 396 noong 2019 na naglalayong amyendahan ang Local Government Code of 1991 sa pamamagitan ng pagpapalawak ng aplikasyon ng Special Education Fund.

Nagbibigay-daan ito sa mga yunit ng lokal na pamahalaan na i-maximize ang kanilang mga resources at magpatibay ng mga bagong patakaran sa edukasyon at mga diskarte sa pag-aaral.

Ang panukala ay nagpapahintulot din sa pondo na magamit sa pagpapatakbo ng Alternative Learning System, kabilang ang pagbabayad ng mga suweldo, allowance at iba pang benepisyo ng mga guro ng ALS.