Bong Go: Palawakin, benepisyo sa solo parents

MULING iginiit ni Senator Christopher “Bong” Go ang kanyang apela para sa pagsasabatas ng Senate Bill No. 1411, kilala rin bilang Expanded Solo Parents Welfare Act of 2020.

Ang panukalang batas, na co-authored at co-sponsor ni Go, ay layong bigyan ng mga karagdagang benepisyo, tulad ng buwanang cash subsidies at health insurance coverage, sa hindi bababa sa 14 milyong solong magulang.

Pumasa na ito sa ikatlo at huling pagbasa sa Senado noong Disyembre 13.

“Hindi po biro ang magpalaki ng anak ng solo lang tayo, pero ang importante kasama natin sila, hindi ba? Mas masaya at masarap ito sa pakiramdam. Kaya kahit nasaan kayo sa Pilipinas, talagang tumutulong ako at isinasama ko po ang mga solo parents,” ani Go.

Bilang pagpapakita ng kanyang patuloy na pangako, ang grupo ni Go ay nagbigay ng mga pagkain at mask sa kabuuang 1,000 solong magulang sa Bongabon National High School Gymnasium sa Nueva Ecija.

Nagbigay rin sila ng mga bagong sapatos o bisikleta para sa kanilang pang-araw-araw na pag-commute at nagbigay sa iba ng mga computer tablet upang matulungan ang kanilang mga anak sa kanilang mga aktibidad sa paaralan.

Bilang karagdagan, ang mga tauhan mula sa Department of Social Welfare and Development ay namahagi ng tulong pinansyal bilang bahagi ng pagtugon sa pandemya ng pambansang pamahalaan.

Bilang tagapangulo ng Senate Committee on Health, hinimok ni Go ang mga magulang na magpabakuna at magpalakas kasama ang kanilang mga kwalipikadong anak upang mas mabilis na makabalik sa normal ang bansa.

“Tulungan niyo kami ni Pangulong (Rodrigo) Duterte. Alam ko nahihirapan na kayo pero kailangan namin ang tulong ninyo…Huwag tayong maging kumpiyansa. Sumunod kayo sa mga paalala ng gobyerno kung ayaw niyo maging estrikto at magsara na naman ang ating ekonomiya,” apela ng mambabatas.

Upang makatulong na matiyak na mayroon silang access sa pangangalagang medikal, nag-alok din si Go na tulungan ang mga may sakit at may kapansanan. Pinayuhan niya silang gamitin ang serbisyo ng Malasakit Centers sa Talavera General Hospital sa Talavera, at sa Eduardo L. Joson Memorial Hospital o Dr. Paulino J. Garcia Memorial Research and Medical Center (DR. PJGRMMC), kapwa sa Cabanatuan City.

Upang palawakin ang probisyon ng pangangalagang pangkalusugan, nag-sponsor din siya ng panukala sa Senado na naglalayong pataasin ang kapasidad ng kama ng DR. PJGRMMC mula 400 hanggang 1,000 kama.

Nauna rito, nagsagawa ng katulad na aktibidad para sa mga displaced workers ang tanggapan ni Go sa Carranglan, Cuyapo, Licab, Muñoz, Talavera at Talugtug mula Enero 25 hanggang 27. Ang mga pamamahagi ay isinagawa sa mga batch upang matiyak ang pagsunod sa mga protocol sa kalusugan at kaligtasan laban sa COVID-19.