Anti-endo bill suportado ni Bong Go

INIHAYAG ni Senator Christopher “Bong” Go na sinusuportahan niya ang pagwawakas sa pagsasanay ng panandaliang trabaho na kilala bilang “endo” o “end-of-contract” sa bansa.

Binanggit ng senador na vineto ni Pangulong Rodrigo Duterte ang panukalang anti-endo noong 2019 dahil pinalawak nito ang saklaw at kahulugan ng iligal na “labor-only contracting” na epektibong nagbabawal sa mga lehitimong paraan ng kontraktuwalisasyon na hindi partikular na nakapipinsala sa mga empleyado.

“Ako naman po, pabor ako dito sa (ending) endo. Kung na-veto man po ito, may dahilan ang Executive Department dahil masyado pong broad ito noon,” ani Go sa isang panayam pagkatapos niyang personal na bisitahin ang mga nasunugan sa Sta. Cruz, Maynila.

Sinabi ni Go na ang pag-veto ay resulta ng masusing pagsasaalang-alang at pagsusuri ng mga kinauukulang ahensya ng gobyerno.

Anang mambabatas, handa siyang maghain at sumuporta sa katulad na panukalang batas na tumutugon sa mga concern ng Executive Department dahil ang nasabing panukala ay isa rin sa mga prayoridad ni Pangulong Duterte, tulad ng nabanggit sa kanyang mga nakaraang State of the Nation Address.

“Hindi pa naman po ako part ng Senado during that time so I’m willing to file, to push for its enactment po sa next Congress tutal ito naman po ay isa sa mga priority ni Pangulong Duterte sa kanyang SONA,” ani Go.

Ipinunto naman ni Go na naglabas ang Pangulo ng Executive Order No. 51, na nagbabawal sa subcontracting kung nilalabag nito ang karapatan ng manggagawa sa seguridad ng panunungkulan, collective bargaining, self-organization, at mapayapang coordinated activities, at iba pa.

“Alam nyo, ‘di pa ata ako miyembro nun, 2018 pa ‘yun. Si Pangulo naman, meron siyang inisyu na Executive Order itong… Executive Order 51 signed by President Duterte May 1, 2018 aims to protect the workers right to security of tenure,” aniya.

Iginiit ni Go na dapat balansehin ng gobyerno ang interes ng lahat ng stakeholder sa pagsasaalang-alang sa mga anti-endo na hakbang.

“Ayaw naman natin matigil ang negosyo dahil wala na pong magbibigay ng trabaho sa maliliit na manggagawa,” ayon sa senador.

Umaasa si Go na kung isa pang anti-endo bill ang isasampa sa susunod na Kongreso, masisiguro nito ang seguridad sa trabaho ng lahat ng manggagawang Pilipino.

“So, kapag meron na tayong ipupush na (anti-)endo sa susunod na Kongreso, siguraduhin muna natin ang proteksyon ng ating mga manggagawa at hindi sila mawalan ng trabaho,” anang mambabatas.