Angel pinagmamalaki pa ring Kakampink, ‘di nanghinayang sa sinuportahan

Ni ROMMEL PLACENTE

MAIPAGMAMALAKI pa rin ni Angel Locsin na isa siyang Kakampink kahit malabo nang manalo bilang pangulo ang inindorso niyang si VP Leni Robredo sa presidential race sa katatapos lang na national elecition noong May 9.
Nangunguna na kasi sa bilangan si dating senador Bongbong Marcos.
May panawagan ang aktres sa kapwa niya Kakampink na idinaan niya sa kanyang Instagram account.
“To my fellow kakampink volunteers, na-witness ko ang kakaibang passion na ibinigay natin sa eleksyong ito. I am proud to have fought with you to the very end.
“Huwag kang manghina dahil ibinigay natin ang lahat…na walang pagaalinlangan.
“Hindi tayo naging madamot, itinaya ang pangalan at oras. Lumaban kahit mahirap para sa ating paniniwala at sa kapwa.
“Kahit imposible. Lumaban tayo hindi para sa isang tao, kundi para sa bayan.
“Kaya kahit matatapos na ang bilangan. Piliin pa rin natin ang bayan. Piliin pa rin natin ang Pilipinas.
“Patuloy tayong magpakita ng malasakit at kumilos para sa kapwa.
“Ipinagdarasal ko na darating din ang araw na makikita natin ang Pilipinas na minimithi. Taas noo.”
At para kay VP Robredo, ang mensahe ni Angel, “Salamat Mam Leni sa inspirasyon.”
Gaya ni Angel, nag-post din sa kanyang Instagram account si Pokwang para iparating kay VP Leni na hindi siya nagsisi na ito ang sinuportahan niya..
Post niya sa Instagram: “Hindi po ako nagsisi na sinuportahan kita, at kahit kailan di ko ikahihiya na sinuportahan ko ang isang Leni Robredo thank you po at hinayaan nyo akong maging parte ng iyong journey, may mga nayakap at nakausap na tao nadagdagan ang kaibigan sa maiksing panahon ng mga rallies na nakasama ako, isang nakakapagod ngunit masayang experience kasama mga nagmamahal sayo.”
At para sa kapwa niya Kakampink, ang message naman ni Pokwang sa mga ito,“Back to work back to normal ang buhay laban ulit.”
Samantala, may panawagan naman si Bianca Gonzalez sa kapwa niya Kakampinks, na idinaan naman niya sa kanyang Twitter account.
Post niya,”IPAGPATULOY natin ang pagtindig para sa ikabubuti ng isa’t isa!
“Kaya’t patuloy nating protektahan at pahalagahan ang ating kalayaan na pinaglaban ng mga nauna sa atin, ‘wag nating baliwalain.”
Ipinagdiinan din ni Bianca na hindi pa ito katapusan ng laban dahil simula pa lang ito ng kanilang pakikibaka para sa pagkakaroon ng maayos at maunlad na bansa.
“Lahat tayo mahal ang ating bansa, kaya sa abot ng ating makakaya, ipagpatuloy natin ang pagtindig para sa ikabubuti ng isa’t isa.
“Di ko alam kung paano, kung gaano katagal, at oo nakakapanghina ng loob, pero kung sama-sama tayo, we stand a chance.
“Kailangan natin labanan para sa mga susunod na henerasyon,” pahayag pa ng TV host.