NCAA Final 4 kasado na sa Martes

KASADO na ang Final Four ng NCAA Season 98 men’s basketball tournament upang pag-agawan ang dalawang finals slot.

Nasilo ng College of Saint Benilde ang top seeding matapos itala ang 14-4 rekord sa pagta­tapos ng double-round ro­bin elimination round.

Nasa ikalawa ang nagdedepensang Letran (13-5) kasunod ang Lyceum of the Philippines University (12-6) at San Beda University (12-6).

Sa pag-usad sa semis ay armado ang Blazers at Knights ng ‘twice-to-beat’ ad­vantage.

Magkukrus ang landas ng Benilde at San Beda, ha­bang maghaharap ang Letran at Lyceum sa hiwalay na semis match.

Sa ngayon ay hawak ng Blazers ang 2-0 baraha laban sa Red Lions.

Ibinaon ng Benilde ang 78-69 panalo sa San Beda sa first round bago muling na­naig, 82-73, sa second round.

Sa kabilang banda, may 1-1 rekord ang Letran at Lyceum sa eliminasyon.

Wagi ang Pirates sa Knights sa first round, 82-75, ngunit wala sa lineup ng naturang laro sina Letran key players Louie Sanga­lang at Brent Paraiso na pa­rehong pinatawan ng sus­pensiyon.

Nakaresbak ang Letran sa second round nang ibulsa ang 68-64 panalo sa Lyceum.

Lalarga ang Final Four sa Martes isang araw para makapag recharge at maihanda ang kanilang tropa sa bakbakan sa semis.