189 CHINESE TOURIST, SINALUBONG NG ILANG OPISYALES NG GOBYERNO

UMABOT sa 189 Chinese na pasahero at 15 flight crew mula Xiamen ang sinalubong ng ilang opisyales ng gobyerno sa kanilang pagdating sa Ninoy Aquino International Airport (NAIA) Terminal 1 sa lungsod ng Pasay kahapon.

Sila ay mainit na tinanggap nina secretary Christina Garcia Frasco ng Department of Tourism(DOT); Chinese Ambassador to the Philippine Huang Xilian at Manila International Airport Authority (MIAA). ) General Manager Cesar Chiong.

Dumating ang mga Chinese tourist sa NAIA terminal 1 bandang 4:45 ng hapon noong Martes sakay ng Xiamen Air flight MH819 at nagpakita sila ng e-travel pass, passport na may nakuhang visa at return ticket sa bureau of quarantine at mga immigration officer na naka-duty sa mga counter.

Binigyan ng mga opisyal ng imigrasyon ang mga bisitang Chinese ng 30 hanggang 59 na araw ng pananatili sa bansa depende sa kanilang nakuhang visa, ayon kay Dana Sandoval, tagapagsalita ng BI.

Kamakailan, inatasan ng Department of Health (DOH) ang mga air at maritime travel authorities na magsagawa ng masusing pagsusuri sa mga health declaration form na isinumite ng mga pasahero mula sa China. Ang mga may sintomas na pasahero na naharang sa pagdating at ang mga ulat sa mga pasaherong positibo sa COVID sa mga port of entry ay dapat iulat sa DOH.

Sinabi ni DOH officer-in-charge Maria Rosario Vergeire na may sapat na health protocols ang departamento at hindi pa kailangan ng karagdagang restriction para sa mga indibidwal na darating mula sa China.

Idinagdag pa nito na hindi na kailangan pang isara ang hangganan ng bansa o magpataw ng mas mahigpit na pagbabantay ukol sa COVID para sa mga papasok na Chinese na manlalakbay.

“ Ang direksyon ng administrasyong ito ay hangga’t maaari, ang mga paghihigpit ay dapat na minimal kung saan hindi natin ikokompromiso ang kalusugan ngunit pinapaboran din ang pagbubukas ng bansa.”ayon sa nasabing opisyal

Ang United States, France, Italy, Japan, South Korea, Spain, at Canada ay kabilang na ngayon sa lumalaking listahan ng mga bansang nangangailangan ng mga negatibong pagsusuri sa COVID-19 mula sa mga manlalakbay na darating galing sa China. (JOJO SADIWA)