CORRECTION OFFICER NG BUCOR, NABIGONG MAGPUSLIT NG ‘KONTRABANDO’ SA NBP

HINDI nakalusot sa alertong guwardiya ng Bureau of Corrections (BuCor) ang isa nilang ‘kabaro’ na nahuli habang nagtatangkang magpuslit ng walong pakete ng sigarilyo o ‘kontrabando’ sa New Bilibid Prison (NBP) sa Muntinlupa City.

Sa ulat na natanggap ni BuCor Director General Gregorio Pio P. Catapang Jr., nakilala ang guwardiya na si CO1 Jerome San Gabriel na nakatalaga sa supply ng ospital ng NBP.

Si San Gabriel ay nahuli ng alertong guwardiya na nakatalaga sa inner gate control matapos na suriin ang mga gamit nito kung saan natagpuan ang mga kontrabando na nakatago sa isang rice plastic bag.

Itinurn-over si San Gabriel sa commander ng guard sa maximum unit para sa karagdagang imbestigasyon at disposisyon.

Nauna rito, nahuli rin ang dalawang tauhan ng BuCor habang nagtatangkang magpasok ng mga kontrabando at ilagay sa loob ng kanilang underwear at pouch bag para sa mga cosmetics.

Sinabi ni Catapang na sa kanyang panunungkulan ay binibigyan niya ang lahat nang pagkakataon na gawin ang tama at kung ano ang ipinag-uutos na makabubuti ay dapat gawin at maaaring baguhin nila ang kanilang masamang ugali at samahan siya ( Catapang ) sa panawagan na repormahin ang bureau o mahuli at harapin ang kahihinatnan ng kanilang mga aksiyon.

Ang BuCor ay mananatiling nakatuon sa walang humpay na pagsisikap nitong alisin sa kawanihan ang mga hindi kanais-nais na empleyado.

Samantala, isa pang taong deprived of liberty (PDL) ang nag-turn over sa mga kontrabando ng mga awtoridad na inilalako sa loob ng detention cell.

Batay sa inisyal na imbestigasyon na isinumite nina Bureau of Corrections Officers 1 Jonathan Tolentino at Andrew John G. Valleser kay J/INSP Angelina L. Bautista, BuCor Deputy Director for Operations at NBP Acting Superintendent, ibinunyag na dakong alas-12:30 ng tanghali kahapon ( Hulyo 20) ay pumunta si PDL Rodeo Ramos sa Office of Director General – Extension na matatagpuan sa loob ng maximum security compound at personal na isinuko ang isang hinihinalang illegal liquidized marijuana E-cigarette (vape type) kay Cezar Oracion, chief, Intelligence and Investigation Section.

Ayon kay Ramos, nang malaman niya na ang hinihinalang iligal na droga ay ibinebenta sa loob ng kanyang area of ??responsibility, bumili siya ng isang piraso sa isang nagbebenta ng PDL na hindi pa nakikilala. Natikman niya ang nasabing produkto at nalaman niyang kapareho ito ng lasa ng marijuana na nag-udyok sa kanya na iulat ang bagay kay Christian Chavez, BuCor ODG- Technical System Specialist.

Isinuko ni Ramos ang kontrabando para sa dokumentasyon at karagdagang imbestigasyon. Dadalhin ang mga kontrabando sa Philippine Drug Enforcement Agency (PDEA) office.

Sinabi ni Bautista na nakakatanggap sila ng mga kontrabando tulad ng iligal na droga at mga paraphernalia na tinurn-over mismo ng PDL bilang resulta ng kanilang apela sa mga ito na makipagtulungan sa bureau sa pagsisikap nitong linisin ang lahat ng katiwalian sa Bucor. (JOJO SADIWA)