ALOK NG MAKATI NG LIBRENG SCHOOL SUPPLIES SA EMBO STUDENTS, TINANGGIHAN NG TAGUIG

TINANGGIHAN ng Taguig ang alok mula sa Makati na ipagpatuloy ang pagbibigay ng libreng uniporme, sapatos, gamit at iba pang pangangailangan sa paaralan ng humigit-kumulang 30,000 estudyante sa pampublikong paaralan sa 10 barangay na sakop ng desisyon ng Korte Suprema sa boundary dispute sa pagitan ng dalawang lungsod.

Sinabi ni Makati City Administrator Claro Certeza na tinanggihan ng mga opisyal ng Taguig ang alok sa isang pulong noong Hulyo kasama si Mayor Abby Binay at mga opisyal ng Department of Education.

Ayon kay Certeza, iminungkahi ni Mayor Abby ang status quo kung saan ipagpapatuloy ng Makati ang kanilang serbisyo sa mga apektadong paaralan upang maibsan ang pangamba ng mga mag-aaral at kanilang mga magulang at maiwasan ang pagkagambala sa operasyon ng paaralan. Gayunpaman, tinanggihan ng mga opisyal ng Taguig ang alok at sinabihan ang Makati na itigil na ang pamamahagi ng mga pangangailangan ng mga estudyante sa paaralan simula ngayong pasukan.

Mula noong 1990s, ang Makati ay nagbibigay sa lahat ng mga pampublikong paaralan ng mga libreng uniporme sa paaralan at mga gamit sa paaralan.

Sa ilalim ni Mayor Abby Binay, tumatanggap din ang mga estudyante ng Makati ng sneakers, white socks at black leather shoes, reusable water tumblers, at Japanese-inspired Randoseru bags. Ang mga mag-aaral ay tumatanggap din ng mga hygiene kit, dental kit, anti-dengue kit, hard hat at Emergency Go Bags, rain gear kabilang ang mga rain coat at rain boots, at mga jacket.

Noong nakaraang Marso, inilunsad ni Mayor Abby ang Project FEED (Food for Excellent Education and Development) na nagbibigay ng mga masustansyang meryenda sa mga mag-aaral mula Kinder hanggang Grade 6 tuwing araw ng pasukan. Ang mga mag-aaral ay binibigyan din ng libreng educational experiential learning trips tuwing school year. (JOJO SADIWA)