TUTOL SA KAPAYAPAAN

Masidhi ang pagtutol ng isang ina sa usapang kapayapaan, bakit at sa anong rason? Hindi batid ang nakaraan ng isang ina na nagbigay pahayag na pagtutol sa pinasok ng kasalukuyang pamahalaan sa usapang kapayapaan sa grupong makakaliwa, sa National Democratic Front (NDF). Hindi batid ang pinagdaanan at kung bakit masidhi ang pagtutol sa kapayapaan na isinusulong ng pamahalaan. O’ sadyang wala sa dugo ang kapayapaan na tatak ng pamilya na kung sino ang kontra sa ibig, ibigay ang nararapat, papayapain sa ilalim ng anim na talampakang hukay, takpan. Sa pamamagitang ito, hindi na kailangan na mag-usap sa walang kapararakan usapin higit ang makipag-usap sa grupong nais makabalik sa mga pamayanan na dating kinikilusan o ginagalawan. At tila nalimutan pangako sa halalan na isusulong ang pagkakaisa ng lahat ng Pilipino. Pagkakaisa ba ang ibig o makaisa?

Sa totoo lang, hindi makita ang dahilan ng abalang pangulo sa pagtutol sa usapang kapayapaan ng pamahalaan at sa makakaliwang grupo. Bilang ina, hindi ba ninanais na makita ang mga anak o bata na nakapaglalaro ng walang pangamba sa kapaligiran. Hindi ba masaya ang isang ina na makita ang mga anak na patungo sa paaralan o pauwi sa tahanan ng walang pangamba, nagtatawanan at nagpapalitan ng kagalingan habang naglalakad. Hindi ba masaya ang isang ina na tahimik at walang putokang maririnig na hudyat ng pagkakaroon ng labanan sa pagitan ng dalawang grupo magkaiba ang tindig? O’ masaya ang isang ina na makita ang maraming pamilya na lumilikas dahil kailangang iligtas ang sarili, mga bata, maging ang ilang mga gamit sa labanan na ‘di kailangan? Wala bang puwang sa isang asawa na masaka at malinang ang mga bukirin upang mataniman at may makain sa kinabukasan? Wala bang puwang sa isang ina ang maalis ang alalahanin sa ano mang dako ng bansa dahil nag-usap ang dating magkakalaban o sadyang walang pusong ina ang tumututol sa kapayapaan? O’ isang alalahanin ang magamit ang panahon sa pag-uusap upang maisulong ang nais na kaunlaran sa kanayunan na ibig ng kasalukuyang pamahalaan? Ano ang tunay na ibig ng isang ina at tutol sa usapang kapayapaan?

Magandang balikan ang nakaraan upang mabigyan larawan ang dahilan sa kung bakit masidhi ang pagtutol ni Inday Siba sa usapang kapayapaan na isinusulong ng pamahalaan sa makakaliwang grupo higit sa NDF. Sa isang pagdinig sa kongreso, malinaw na malaki ang pagtutol ng bloke ng mga kinatawan ng makabayan sa tinatawag na Confidential and Intelligence Fund (CIF) na kasama sa budget na inihain ng mga tanggapan na pinamumunuan ng abalang pangulo. Sa pagtutol na ginawa, tila tinamaan ng kidlat ang katauhan ng abalang pangulo at nalantad ang pagiging masiba sa pera ng bayan. At tila nasunog ang P650M CIF na ‘di batid ang paggagamitan sa mga tangang tanggapan. At ang masakit nabalikan ang P125M ‘di maipaliwanag kung paano naubos sa loob ng labing isang araw. Sa huli, naging ID ni Inday Siba ang CIF na sumusunog sa ambisyon sa ‘28. Ayun yun eh.

Sa pagsulong ng pamahalaan sa usapang kapayapaan, nagkaroon ng dahilan si Inday Siba upang maglabas ng sentimyento de asukal at mariing tinututulan ang pinasok na kasunduan. Ayon sa abalang pangulo, ibig ng makakaliwang grupo na balikan ang pamayanan na dating hawak na sa ngayo’y nag-iba na ng tindig sa pagpasok kuno ng pamahalaan. Ngunit tila nakalimot si Inday Siba sa ibig ng Uniteam na magkaroon ng pagkakaisa sa bansa upang maisulong ang ibig na pag-ulad ng bansa. Batid na ‘di lahat ng nabangit na pangako’y maisasakatuparan ngunit ang hakbang na usaping pangkapayapaa’y isang magandang kilos ng pamahalaan. Ang magkaroon ng kapayapaan sa bansa ang maaring tulay sa nais na pag-unlad sa hinaharap. Ang pagtatayo ng iba’t – ibang negosyo saan mang lugar na may kapayapaan ang simula ng pag-unlad na ibig sa kinabukasan.

Sa pagtutol ni Inday Siba sa usapang kapayapaan, may nagparamdam ng biglang may sumabog sa isang bayan sa katimugan na ikinasawi ng ilang tao. Hindi nahinto sa pagsabog ang alalahanin ng bayan dahil umakyat sa Luzon ang ilang banta ng pagbobomba na naglagay maging sa punong rehiyon ng bansa sa “red alert”. Sa paglalagay sa red alert, na tuliro ang kapulisan at kasundaluhan sa maaaring maganap na magpapabagsak sa kabuhayan ng bansa. O’ sadyang pinahihina ang liderato ng bansa upang ihanda ang isang senaryo na ibig magpalit ng pamamahala? Ang “bomb scare” ba’y pagsubok upang mabatid kung paano kikilos ang kasalukuyang liderato sa nais ng iilan. O’ ito’y senaryo na ang ibig ng prinsesa’y dapat ibigay ng ‘di maletse ang namumuno sa bansa.

Ang usapang kapayapaan na isinusulong ng pamahalaan at ng NDF na tinututulan ni Inday Siba ang tamang hakbang higit sa pagsulong sa nais na kaunlaran. Ang gawa-gawang pananakot na pambobomba at pagkalat ng balita’y ‘di dapat ipagwalang bahala. Ang mabatid ang puno’t dulo ng balitang bangit ang mapaggagamitan ng CIF upang matuloy ang may pakulo at ikulong. Malinaw na dumaan sa pagsubok sa buhay ang taong ayaw ng kapayapaan higit kung ‘di tuwirang mabalikan ang gumawa ng kamalian. Hindi titigil ang sino man lalo’t ito’y mapagtanim ng sama ng loob sa pagkakataon na mababalikan ang mga taong humaharang sa kinabukasan. Ang masama, tila ginagamit ang kaperahan na naipon sa mahabang panahon upang isulong ang sariling ambisyon. Hindi bale ang samahan sa nakaraan maging ang bayan, ang mahalaga’y ang kinabukasan higit kung ang sariling ama ang nakasalang upang magdusa.

Tilamsik ng diwa ang masidhing pagtutol ni Inday Siba sa usapang kapayapaan at ang ibig nito’y kaguluhan sa bayan ng lumuwag ang pagutol sa milyon-milyong kaperahan. Ang pagtutol ng makabayan block sa pondong nais ni Inday Siba ang silip na dahilan sa ayaw sa usapang kapayapaan. Ang pagsayaw ni Ispiker at pag-ayon ni Boy Pektus sa usapang kapayapaan ang naglinaw sa tubig na malayo sa radar ng liderato ang mga Osla ng Dabaw. Silip ng mga hindi henyo na walang ibibigay na CIF at walang pipigil sa ICC kaya’t ang kilos pananakot, panggugulo ang gawa upang iparamdam na may mga taong tapat at handang tumapat sa ngalan ng sariling pakinabang. Isang paramdam ang kilos ni Inday Siba sa pagtutol sa usapang kapayapaan upang ‘di mawala ang pakinabang sa posisyong tangan lalo’t tinamaan ng kidlat sa pagbubunyag ng makabayan block sa kasibaan sa pera ng bayan.

Maraming Salamat po!!!