7 Tsekwa sangkot sa credit card fraud arestado

ARESTADO ang pitong Chinese nationals ng National Bureau of Investigation (NBI) sa kaso ng credit card fraud at panunuhol.

Sa inisyal na imbestigasyon, kina-cash out ng mga suspek ang pera mula sa credit card ng mga biktima nito sa Europa sa pamamagitan ng Point of Sale device (POS), saka nito pangangakuan ang may-ari ng POS ng 20 porsyento mula sa kabuuang halaga ng ninakaw.

Dalawang suspek ang unang nahuli ng NBI bago nito nadakip ang lima pa nang mag-alok ang mga ito ng P1.5 million kapalit ng kalayaan ng mga ito.

Narekober din ng mga operatiba mula sa mga suspek ang ilang baril at isang high-grade na granada.

Nagbabala ang NBI sa mga magpapagamit sa ganitong kalakaran, sinabing agad na kakasuhan at aarestuhin ang mga ito.

Nasampahan na ng patong-patong na kaso ang mga nahuling suspek. (Jocelyn Domenden)