FEELING API

FEELING ang tagapagmana ng trono ng Lipi ng Mangmang ng sipain bilang kalihim ng Kagawaran ng Edukasyon. Hindi nagpahalata ngunit silip sa hilatsa ng mukha ang kalungkutan dahil sa pagkawala ng bakang gatasan para sa kapritso ng katawan. Nang masibak bilang kalihim, ‘di nag dalawang isip o nagpatumpik-tumpik at tinularan, ginaya o ipinakita ang gawi ni Jun Singhot na tila naghahabol ng hininga bago tumugon sa katanungang ibinabato. Sa pagputol ng ugnayan ng nakatambal sa halalan ‘di na kailangan ang pag-iingat higit sa pagpapakita ng pagkadismaya sa mga nakikitang salang hakbang ng kasalukuyang pamahalaan. Sa isang banda, hindi nagpakita ang administrasyon higit ang pangulo ng pagka-irita sa halip nagpamalas ito ng pagiging maginoo sa likod ng ipinakitang pang –ookray ni Inday Sipa.

Sa SONA, hindi nakita ang anino ni Inday Sipa sa Kongreso kahit isa ito sa mga natatanging panauhin. O’ dahil ito’y oras at araw ng pangulo ng bansa. Hindi nagawa ng tagapagmana ng Lipi ng Mangmang na magpakita sa punong tanggapan ng matalik na karibal na si Waray Upay. Sa SONA, nariyan ang ulat ni Jun Singhot sa mga nagawa sa nakaraang taon at gagawin sa susunod na taon. Dahil wala si Inday Sipa sa bulwagan, ipinahayag ni Jun Singhot ang pagpapatigil sa lahat ng operasyon ng POGO sa bansa na sinalubong ng nagtatayuang kinatawang bayan at mga bisita ng palakpakan. At ito ang naging pinakatampok sa isang oras at kalahating talumpati. Hindi magkamayaw ang tao sa Kamara sa saya dahil sa tuwirang paglalahad na ‘di maka Tsekwa ang tindig ni Jun Singhot. At ang bangit hinggil sa pagpapasara sa POGO ang malakas na bwelta ng anak ti’ Batac sa patutsada ng katimugan. Tampo pa more.

Maginoong tunay ang tumatao sa puno ng Balite sa Malacanan at ‘di bangit ang ngalan ng sumibat na abalang pangulo, sa halip binigyan diin at inatasan ang bagong kalihim ng DepEd na simulan ang pag-aayos ng mga bagay bagay sa kagawaran na ‘di nagawa ng dating kalihim. Subalit ‘di ang gawa sa kagawaran ang pumutol sa relasyon ng magkasangga, ang utos sa PAGCOR na linisin ang bayan sa salot ng POGO. At ‘di nagtagal, nariyan ang pananalakay sa mga lugar ng ka POGOan kung saan nalambat ang mga Tsekwa na nakakaduda ang pagpasok sa bansa. Ang masakit kay Inday Sipa, nabatid na ang kaibigan at dating tagapagsalita ni Totoy Osla ang tumatayong abogado ng POGO. Sa pagkakabatid ng kung sino ang abogado ng POGO, hindi maitago ang pagkadismaya ni Inday Sipa at feeling api ang drama. At ang kinatatakutan na sa darating na araw ay madako o makakuha ng dokumento ng pagka-ugnay nito sa operasyon ng nasabing mga sugalan.. Hindi pa usapin ang 1,200 Tsekwa na lambat sa kaTimugan na may hawak na peketos na dokumento. Hay ang sindikato nga naman.

Sa kabilang banda, hindi pa man dumarating ang bagyong Carina sa bansa, nagpa-una na si Inday Sipa na lalabas ng bansa upang magpalamig at sa ibang lugar susubaybayan ang mga kaganapan sa usapin ng POGO. At sa pagpasok ng bagyong Carina hindi na awat si Inday Sipa sa pagsibat patungo sa ibang lupalop, hayan Inday Sibat na ang ngalan ‘di na Inday Sipa, hehehe. At tila tadhana ang may ukit, maraming Pinoy ang nadismaya na umaasa sa tulong na galing sa idolong si Inday Sibat. Subalit nagbago ang regla at naging masipag at maaasahan si Jun Singhot sa panahon ng pangangailangan, na ikinatuwa ng maraming Pinoy.

Sa tuwiran pagkilos ni Jun Singhot sa pangangailangan ng mga apektado ng bagyo, dagdag na maraming puntos ang nakuha nito sa halip na mapunta kay Inday Sibat. Positibo ang dating sa Pinoy ng galaw ni Jun Singhot higit na nakita ito sa oras de peligro. At sa pag-lisan ni Carina na tumungo sa Taiwan, napag-alaman na una pang lumapag si Inday Sibat sa Alemanya upang magliwaliw at manood ng konsyerto ni Taylor Swift. Wow talagang maasahan ang Lipi ng Mangmang sa paglustay sa salapi ng bayan.

Hindi pa man tapos ang paghiyaw at palakpak sa konsyertong pinapanood, muling sumalakay ang mga alagad ng pamahalaan sa bahay ng kaibigang si Haring Shoke sa Lungsod ng Baguio. Nasabat ang ilang Tsekwa na ‘di makapagsalita ng lenggwaheng Pinoy. Nabukodo ngunit patuloy at todo tangi nang lahi ni JB ng Cebu na ‘di pag-aari ang sinalakay na bahay gayung batid ng bayan ang pagpapa-bendita noong 2019, tangi pa more.

Sa pagdaan ng mga araw at kaganapan, kayang tiisin ni Inday Sibat ang mga pangyayari, ngunit ang tuwirang bawasan ang bilang ng bantay na seguridad tila personalan na ang dating at feeling api ang peg ng nagliliwaliw na pangalawang pangulo. Sinong ‘di nababahala sa pagpapabalik sa “mother unit” ng mga pulis na bumibilang na 75 habang ito’y wala sa bansa, ano ibig ipahiwatig, ang tuluyang mawala si Inday Sibat, hayan feeling aping-api. Masakit kay Inday Sibat na alisan ng bangit na bilang na kasama sa 433 tauhan na nagbabantay sa kanyang kaligtasan. Hindi sapat kay Inday Sibat ang 358 na nalalabing bantay dahil sa tangan pwesto bilang pangalawang mataas na lider ng bansa. Tunay na mabigat at mahirap ang maghintay ng kaganapan sa pangulo. Ang pagbabawas ng tagabantay ay tuwirang inilalagay kuno ng hepe ng kapulisan ang kaligtasan ng susunod na pangulo. Heneral Marbil ingat, hindi mapagtanim si Inday Sibat, ngunit ‘di nakakalimot at baka makasilat sa kinabuksan.

Sa totoo lang, pasanin ni Mang Juan ang mga pasahod sa mga tauhang bangit na labis labis ang bilang. Bakit umabot sa daan-daan ang mga tagabantay ni Inday Sibat gayung ang gawa nito’y tumunganga at maghintay ng kaganapan sa pangulo. O’ sadyang kinasanayan ang kapritso ng katawan dahil minsang pinamunuan ng ama ang bansa. O’ sadyang maraming atraso ito sa bayan higit sa mga biktima ng ama sa bigong laban sa droga at ganoon kalaki ang takot ng ale. Ang laki ng bilang ng seguridad na ‘di nakita sa mga naunang pangalawang pangulo’y larawan ng pag-abuso sa kapangyarihan at sa pera ng bayan. Ang feeling api na drama ni Inday Sibat ang malinaw na naghahanap ng simpatya’t kakampi. Ngunit sa pag sibat sa panahon ng delubyo’t pangangailangan ng taong bayan, tila walang epekto ang dramang api.

Panghuli, sa Kongreso, bawasan ang pondo ang opisina ng pangalawang pangulo maging ang seguridad na 358 at gamitin ang pondo sa bagay na may tuwirang pakinabang ang bayan. Ang feeling api ni Inday Sibat ay kapritso at kailangan itama ng ‘di gayahin sa kinabukasan. Alisin ang labis sa opisina ni Inday Sibat ng mabawasan ang pagiging masiba.

Maraming Salamat po!!!!