Banta upang takpan ang katiwalian

NAGULAT ang publiko sa pasabog na pahayag ni Vice President Sara Duterte tungkol sa paghuhukay ng katawan ni dating Pangulo Ferdinand Marcos, Sr. at pagtatapon nito sa West Philippine Sea (WPS).

Pero malinaw na ito’y isa lamang estratehiya upang ilihis ang atensyon mula sa mas malalim na isyu na bumabalot sa kanyang opisina at ang kontrobersyal na pamana ng pamilya Duterte.

Sa mga pagdinig kamakailan ng House of Representatives Committee on Good Government and Public Accountability, lumabas ang mga tanong ukol sa paggamit ni Sara ng milyon-milyong piso mula sa ‘confidential funds’ ng kanyang tanggapan.

Imbes na magpaliwanag kung saan napunta ang pondo, gumamit si Sara ng mga matitinding banta at itinuturo ang iba. Umiinit ang kanyang sagupaan laban sa mga Marcos at sa kasalukuyang administrasyon, na malinaw na paraan upang ilayo ang usapan sa kanyang sariling mga problema?

Ito ay isang taktika na natutunan niya sa kanyang ama. Noong panahon ni Pangulong Rodrigo Duterte, kilala siya sa pag-iwas sa mga eskandalo sa pamamagitan ng mga malalakas na pahayag at dramatikong paglihis ng atensyon. Ngunit, sa mga kamakailang QuadComm hearings sa Kongreso, unti-unti nang lumilitaw ang kalaliman ng katiwalian ng kanyang pamahalaan. May mga testimonya na nag-uugnay sa kanya sa isang masalimuot na sistema ng katiwalian, pang-aabuso, at pakikipagkutsaba sa mga ilegal na operasyon ng droga. Mula sa extrajudicial killings hanggang sa mga koneksyon niya sa mga sindikatong Tsino, nagsisimula nang bumungad ang mga maruruming sikreto ng dating pangulo.

Matagal nang iniuugnay ang pamilya Duterte sa mga alegasyon ng katiwalian at pang-aabuso sa kapangyarihan, at malinaw na sumusunod si Sara sa yapak ng kanyang ama. Imbes na maging transparent sa paggamit ng pondo ng bayan, mas pinipili niyang gumamit ng mga drama at paglilihis ng isyu, umaasang hindi mapapansin ng mga Pilipino ang kanyang mga kalokohan. Pero dahil sariwa pa sa isipan ng publiko ang mga resulta ng QuadComm hearings, tila hindi na makakatakas ang pamilyang Duterte sa mga banta at drama. Mismo!

Mula sa mga madilim na lihim ng kanyang ama hanggang sa sarili niyang isyu ng maling paggamit ng confidential funds, kitang-kita na ang desperadong mga aksyon ni Sara ay nagsasabi ng marami. Karapat-dapat ang mga Pilipino ng mas mabuting mga lider, hindi yaong mga nang-aabuso ng kapangyarihan at umiiwas sa responsibilidad.

Subaybayan!