Bong Go sa PhilHealth: Emergency Outpatient Care Package, bilisan

Muling nanawagan si Senador Christopher “Bong” Go sa PhilHealth na ipatupad na ang Emergency Outpatient Care Package gaya ng ipinangako ng mga opisyal nito sa kamakailang pagdinig ng Senado.

Nagbabala si Go, chairperson ng Senate Committee on Health na dahil sa lumalalang lagay ng panahon at displacement ng mga pamilya dulot ng kalamidad, lalong kailangan ng agarang aksyon upang maprotektahan ang kalusugan ng publiko sa gitna ng patuloy na hamon sa kapaligiran.

“Ngayong nahihirapan ang mga kababayan natin dahil sa bagyo at baha, kailangan natin ng mabilisang solusyon para maibsan ang hirap nila,” sabi ni Go at idinagdag na ang serbisyong ito ay kritikal at dapat ipatupad, alinsunod sa mga umiiral na batas.

Ayon sa Philippine Atmospheric, Geophysical, and Astronomical Services Administration (PAGASA), ang track ni Kristine ay nananatiling hindi sigurado, na may posibilidad na bumalik, at posibleng humantong sa mas malakas na pag-ulan at matinding pagbaha sa mga rehiyon na nahihirapan na sa pinsala.

“Nakikita natin ang mga pamilyang walang tahanan, tubig, o agarang tulong medikal. Ang PhilHealth ay may mga mapagkukunan at dapat kumilos nang mabilis upang gawing accessible ang outpatient at emergency services sa mga nangangailangan,” giit ni Go.

Ipinunto ni Go na ang PhilHealth ay kasalukuyang may hawak na malaking pondo na maaaring magamit upang matulungan ang mga komunidad na apektado ng mga sakuna.

Binigyang-diin niya na upang maibigay ang mga pangangailangang ito, ang pondo ay dapat manatili sa loob ng sektor ng pangangalagang pangkalusugan at gamitin para direktang makinabang ang mga Pilipino.

Ang Emergency Outpatient Care Package ng PhilHealth, ayon kay Go, ay dapat na idinisenyo upang magbigay ng agarang serbisyong medikal at access sa mga mahahalagang gamot.

Hinikayat pa ni Go ang PhilHealth na gamitin ang mga resources nito para sa preventive healthcare packages upang maibsan ang pasanin sa mga ospital na nahihirapan na sa mataas na occupancy rate.

“Panahon na para palawakin ng PhilHealth ang mga serbisyo nito, hindi lang para sa mga nasa ospital kundi pati na rin sa preventive, emergency at outpatient care,” idiniin ng senador.