MARCOLETA BINATIKOS ANG KAPWA NIYA KONGRESISTA SA NATIONAL RALLY FOR PEACE NG INC

PINAYAGANG makapagbigay ng political message si Sagip Party-list Representative Rodante Marcoleta sa nagpapatuloy National Rally for Peace sa Quirino, Grandstand.

Sumentro ang talumpati ni Marcoleta sa pagdepensa kay VP Sara Duterte, kasabay ng pagkwestiyon nito sa mga kasamahang kongresista sa harap ng mga miyembro ng Iglesia ni Cristo (INC).

Ito ay kaugnay pa rin sa pagdinig sa budget ng Office of the Vice President (OVP) noong 2024, na tila hindi aniya ginawa in aid of legislation kundi para lamang usigin ang pamilyang Duterte sa politika.

Inilahad din ni Marcoleta ang mga problema ng bansa na tulad ng pagtaas ng presyo ng mga pagkain at kuryente na siyang dapat tutukan ng pamahalaan.

Si Marcoleta, ay isa sa mga tagasuporta ni Bise Presidente Sara Duterte, at tatakbong senador.

Pero bago nito, nauna nang sinabi ng mambabatas na ang INC ay hindi kumikiling sa anumang panig ng pulitika at nais lamang magkaroon ng pagkakaisa sa pagitan ng mga opisyal ng pamahalaan gaya ng pangulo at pangalawang pangulo.
***
Samantala sa pinakahuling datos ng Manila Disaster Risk Reduction and Management Office (MDRRMO), mahigit 1.4 million na ang crowd estimate dito sa paligid ng Quirino Grandstand as of 2pm.

Karamihan sa mga ito, mula pa kagabi o madaling araw na naghintay at mula pa sa iba’t ibang lugar sa Metro Manila at mga karatig na lugar

Tuluy-tuloy ang pagdating ng mga nakikiisa sa Nationwide Rally for Peace kahapon.
Ilang mga personalidad at mga opisyal naman ang dumating para magbigay ng kanilang pakikiisa sa ipinapanawagan ng religious group.

Layon nitong tutulan ang impeachment laban kay Vice President Sara Duterte at ipanawagan ang pagkakaisa ng Pilipinas.

***
Kung may tanong, suhestiyon o komento ’wag mag-atubiling tumawag o mag-text sa numerong 0939-7177977 at 0936-8625001 o di kaya mag-email banderapilipino@yahoo.com/balyador69@gmail.com.