Richard showbiz na muna kaysa politics

Ni ROMMEL GONZALES

NOONG 2019 at 2022 elections ay nabigo si Richard Yap na mahalal bilang congressman sa unang distrito ng Cebu.

At dahil nalalapit na ang eleksyon sa Mayo 12, 2025, napag-usapan namin ni Richard ang tungkol sa pag-ayaw na niyang tumakbo sa pulitika.

“Masyadong magulo and mahirap actually, so hindi na muna…

“I mean, well as much as possible, parang ayoko, there are a lot of offers pero inaano ko muna what’s best for me.

“Kasi pag inisip mo yung mga tao pero hindi ka naman talaga iniisip din, mahirap ‘yan, so huwag na muna.”

Masaya na raw siya sa buhay-showbiz.

“Yeah, showbiz and negosyo na lang muna tayo.”

Artista si Richard sa “Fatherland” na pinagbibidahan nina Allen Dizon at Iñigo Pascual.

Ipapalabas sa mga sinehan sa April 9, 2025, nasa “Fatherland” rin sina Cherry Pie Picache, Mercedes Cabral, Ara Davao, Jeric Gonzales, Kazel Kinouchi, Rico Barrera, Abed Green, Jim Pebanco at Angel Aquino.

Mula sa produksyon ng BenTria Productions ni Benjamin Austria at Heaven’s Best Entertainment, ito ay mula naman sa direksyon ni Joel C. Lamangan.