3 WUSHU FIGHTER TIYAK NA ANG MEDALYA SA ASIAN GAMES

TATLONG Filipino fighters ang nakatiyak kahit bronze medals sa 19th Asian Games matapos sumulong sa semifinals ng kanya-kanyang weight class sa wushu.

Binubuo ito nina Arnel Mandal, Gideon Fred Padua at Clemente Tabugara Jr.

Nagwagi kasi si Mandal 2-0 laban kay Jamshidbek Guliboev ng Uzbekistan sa quarterfinals ng men’s 56 kg. class kung saan nakatakdang makaharap niya ngayong araw si Avazbek Amanbekov ng Kyrgztan para makakuha ng puwesto sa finals.

Hindi rin pinaporma ni Padua 2-0 si Agajumageldi Yazymov ng Turkmenistan sa 60kg. division na susunod na makakaharap nito ay si Shoja Panahigelehkolae ng Iran par sa semifinals ngayong araw.

Habang dominado ni Tabugara ang laban 2-0 laban kay Abdusamat Ashirov ng Kazakhstan sa 65kgs at makakaharap din ngayong araw si Samuel Marburn ng Indonesia.

Sa kasalukuyan kasi ay mayroong dalawang bronze medal ang Pilipinas sa pamamagitan ni Patrick King Perez ng men’s Taekwondo at si Jones Inso ng men’s taijiquan-taijijian all-around ng wushu.