PARA SA KINABUKASAN NG KABATAANG PILIPINO

SA bawat bansa, ang kinabukasan ay nakasalalay sa mga kabataan.

Sabi nga, ang kabataan ang pag-asa ng bayan.

Sila ang magiging tagapagdala ng mga adhikain, pangarap, at halaga ng ating lipunan.

Kaya napakahalaga na bigyan sila ng tamang paghahanda upang harapin ang hamon ng hinaharap.

Ang pagsasakatuparan ng Memorandum of Agreement (MOA) sa pagitan ng Department of Education (DepEd) at Private Sector Advisory Council (PSAC) – Jobs Committee ay isang malaking hakbang tungo sa layuning ito.

Ang bagong work immersion program para sa mga senior high school students ay hindi lamang isang pagsasanay kundi isang pangako ng isang mas maliwanag na bukas para sa mga kabataang Pilipino.

Kung hindi ako nagkakamali, sa ilalim ng programang ito, ang mga mag-aaral ay magkakaroon ng pagkakataong masubukan ang kanilang mga kakayahan at malaman ang mga inaasahan ng industriya.

Hindi na sila magiging limitado sa teorya kundi magkakaroon ng aktwal na karanasan sa mga larangan tulad ng information technology, turismo, agrikultura, pagnenegosyo, at manufacturing. Ito ay isang makabuluhang hakbang upang maiwasan ang jobs and skills mismatch na matagal nang bumabagabag sa ating lipunan.

Ang kahalagahan ng programang ito ay hindi lamang nasusukat sa dami ng mga mag-aaral na magiging “job-ready” kundi sa pagpapalalim ng kanilang pag-unawa sa totoong mundo ng pagtatrabaho.

Sa halip na mabuo ang imahe ng isang diplomasya na walang konkretong layunin, ang mga kabataan ay magkakaroon ng malinaw na direksyon at kumpiyansa sa kanilang tatahaking landas.

Ang hands-on work experience na masusubukan nila ay isang mabisang paraan upang i-angat ang kanilang kakayahan at higit na magtagumpay sa kanilang mga piniling karera.

Sa pangunguna nina Pangulong Ferdinand Marcos Jr., DepEd Secretary Sonny Angara, at PSAC Jobs Committee Lead Joey Concepcion, ipinapakita ng pamahalaan at pribadong sektor ang kanilang matibay na dedikasyon sa pagpapabuti ng kalidad ng edukasyon sa bansa.

Malinaw na ang kanilang kolaborasyon ay isang inspirasyon na nagpapakita na ang bawat sektor ay may mahalagang papel sa paghubog ng kinabukasan ng ating mga kabataan.

Ang pagpapalakas sa edukasyon ay hindi lamang tungkol sa pagbibigay ng kaalaman kundi pati na rin sa pagtuturo ng mga kasanayan at halaga na kinakailangan upang magtagumpay sa buhay. Ito ang tunay na diwa ng isang edukasyong nakatuon sa kabataan—isang edukasyong nakaugat sa realidad at patuloy na umaayon sa mga pangangailangan ng modernong panahon.

Sa pamamagitan ng mga programang tulad nito, hindi lamang natin binibigyan ng pag-asa ang mga kabataan kundi binibigyan din natin sila ng mga konkretong pagkakataon upang maabot ang kanilang mga pangarap.

Ang tagumpay ng programang ito ay hindi lamang matutukoy sa mga numero kundi sa mga buhay na mababago, sa mga pangarap na maisasakatuparan, at sa isang lipunan na mas handa sa hinaharap.

Ang kinabukasan kabataang Pilipino ay ang kinabukasan ng ating bansa.

At sa bawat hakbang na ating ginagawa ngayon, tayo ay naglalagay ng pundasyon para sa isang mas maunlad, mas makatarungan, at mas matagumpay na Bagong Pilipinas.

***

Catch Gilbert Perdez’s “Barangay 882” radio show every Saturday from 4:00 PM to 5:00 PM. Tune in via ALIW Channel 23, DWIZ AM Radio, DWIZ 882 Facebook page, or DWIZ ON-DEMAND on YouTube. You can contact him via email at gil.playwright@gmail.com or through this number: 0991-3543676.