Mga nagwagi sa Sinag Maynila filmfest, inanunsyo na
Advertisers
Ni Archie Liao
INANUNSYO na ang mga nagwagi sa Sinag Maynila filmfest sa awarding ceremonies na ginanap kamakailan sa makasaysayang Metropolitan Theater.
Wagi ng best actor si Ronnie Lazaro para sa pelikulang “Gospel of The Beast” samantalang ang Fil-Chinese actress na si Rebecca Chuaunsu ay tinanghal namang best actress para sa dramang “Her Locket.”
Ito ang ikatlong award ni Chuaunsu na una nang nanalo bilang best actress sa Wu Wei Taipei International Film Festival sa Taiwan at 2023 Festival International du Film Transsaharien de Zagora sa Morocco.
Nanalo namang best supporting actor si Jansen Magpusao para sa “Gospel of the Beast” at Elora Espano sa kategoryang best supporting actress para sa pelikulang “Her Locket.”
Naiuwi rin ng “Her Locket” ang mga tropeo para sa best picture at best ensemble acting.
Panalo rin ito ng technical awards tulad ng best director para kay J. E. Tiglao, best screenplay para kay J.E. Tiglao at Maze Miranda, best cinematography para kay Jag Concepcion at best production design para kay James Rosendal.
Nakopo naman ni Bryan Wong ang best editing award para sa action movie na “Banjo.”
Sa kategoryang best short film, wagi ang “As The Moth Flies” samantalang itinanghal na best documentary film ang “Ino.”