SAFE KA NA
Advertisers
Sa pagtitipon ng magkakaibigan lumalabas ang katotohanan dahil ito’y grupo o lugar ng pagalingan ng ano mang nagawa sa buhay. Walang pag-aatubili na magsabi sa mga nagawa maging mali o tama higit kakulay o kapara ang mga kahalubilo sa umpukan. Sa pagmamagaling o pagmamataas sa iba ang karaniwang dahilan sa pagkakadulas sa mga nasasabi na kalamangan kuno sa kasama o kaibigan. Subalit iba ang dating ng banggit ng Tserman ng itim na laso na si Wigman na tila nadulas sa ginagawang pag-uusisa sa usapin ng anomalya sa proyekto ng “flood control” na banggit na “safe ka na”. Pahayag na patukoy kay Seksi na tila simang sumilo sa nag-uusisa na kahit anong pagpalag na gawin ay higit na lumalim ang pagkakasilo na tuluyang nagbaon sa taga ng sima sa pagkakahuli.
Sa batuhan ng mga biruan sa pormal na usapin ng katiwalian ang tila nakaligtaan ng mga nag-uusisa na nagbunsod sa ilang kabaro na subukang baguhin ang liderato ng bahay na puno ng anay ng ‘di tuluyang mawala ang halaga o respeto ng tao sa bugok na kapulungan. Ang pagpapalit sa mga haligi ng bahay ang hakbang na ‘di inaasahan ng mga buktot habang nagkakasiyahan sa pag-uusisa na dama na malilinis ang sarili’t kabahayan ng ‘di madudungisan. Nang biglang magpasya ang nakakaraming kabaro na mag-iba ng maglilinis sa kabahayan, hayun lumabas ang katotohanan na may dungis ang ilang nag-uusisa na pilit nililinis ang sarili at ibig ipaako sa mga kaulayaw ang salang gawa.
Ang palitan ng liderato sa bugok na kapulungan ang mitsa sa pagpapalit sa mga liderato sa mga komite ng kabahayang banggit higit ang sa itim este asul na laso na nagsimula ng pag-uusisa sa usapin ng katiwalian sa multong proyekto sa “flood control”. Sa pag-upo ng bagong Tserman na mag-uusisa sa usapin sa itaas, dahan dahang bumabalik sa kulay asul ang laso sa pagkakabatid sa mga taong mabanggit na silip ang pagiging aktibo sa pag-uusisa. At hindi pa nagtatagal sa pag-uusisa ang bagong Tserman ng asul na laso, kara-karakang nabanggit ang ngalan ng dalawang kasamahan na sina Seksi at Jewell Bilyonueba sa mga multong proyekto. Sa pagdinig, banggit ng mga bisita ng kapulungan ang 30% inaabot sa mga kasama ni Ping sa mga multong proyekto. Ang mga banggit na multong proyekto ang tuwirang binatid at dinalaw ng pangulo na napasuntok sa hangin sa galit sa ‘di namalas na mga proyekto na nasa talaan ng DPWH. At tunay na may galaw na ‘di makita sa una ngunit sa paglaon ng panahon, lalabas ang katotohanan.
Sa maagang pagbubunyi ng mga tagapaglinis na mga unang nag-uusisa, silip na magtutuloy-tuloy ang layon na mailayo ang mga ngalan sa dungis na nasa harapan. Ang pagbabagong naganap sa bugok na kapulungan ang nag-ayos sa katayuan ng kabahayan o ng bayan. Nagsabi ng katotohanan ang mga saksi na tuwirang may kabatiran sa mga naganap na anomalya at inilabas ang ngalan ng mga tagapaglinis na unang nagbanggit na “safe ka na”. Ganap na ‘di mapipigilan ang katotohanan na lumabas nang kusa higit bayan ang naghahanap ng hustisya sa mga kaganapan na likas ngunit pinagkakitaan ng ilan dahil sa salang galawan.
Ang pagpalit ng liderato’y tunay na nakalaan sa kagalingan ng bayan na naghahanap ng katarungan higit sa paggamit ng salaping bayan. Ang paglabas ng ngalan ni Seksi at Jewell ay masasabing nagmula sa itaas upang bawasan ang mapag-imbot at mapagsamantalang kinatawang bayan. Hindi naghahanap ng sala sa mga banggit na kinatawan ngunit ang pagkawala sa sala’y sariling likha na dapat panagutan. Sa isang banda, nasilip na ‘di sapat ang programa ng pamahalaan sa mga napiit higit ang isang dating halal kahi’t ang sala’y tuwiran sa bayan. Hindi nakitaan ng pag-unlad sa pag-uugali’t kababaang loob ang Seksing senador na muling nasasangkot sa milyon milyon katiwalian. Sa totoo lang, sa nasilip na isang “video clip”, maging ang karaniwang babae’y sinusuwag ni Seksi sa isang paradahan.
Sa kabilang banda, lumitaw ang walang kinang na si Jewell Bilyonueba na namalas ang pang-uupat kay Beybilina na salingin ang nagsasalitang senadora sa isang talakayan sa impeachment ni Inday Gala. Walang GMRC ang pastor na naghuhusay-husayan gayung batid ang katiwalian sa katawan. At naglabasan sa kasalukuyan ang tanong kung paano nakatakbo sa halalan gayung ‘di na dapat na makapagtala bilang kandidato sa halalan sa ano mang posisyon. Tunay na ang sanlumikha ang may ibig na mabatid ng bayan ang salang pagkatao ng pastor na ngayo’y tuwirang pinapangalanan sa pagdinig na nagaganap sa malawak na kapulungan. Ang tuwirang pagbanggit sa mga ngalan ng mga bugok na unang nabanggitang “safe ka na” ay tila boomerang na malakas ang dating tila mauunsiyame ang mga usaping nakabinbin sa mga hapag ng hukuman.
Sa totoo lang, umalagwa ang ngalan ng mga bugok sa pagkakabanggit sa pagdinig na ‘di napanghawakan. Ang usapin sa malawak na kapulungan at pagsalin ng liderato sa asul na laso ang ‘di napanghawakan kaganapan na ‘di magpapatulog sa mga nabanggit ang pangalan. Asahan ang pagpayat ni Seksi at ang pagkakautal ni Jewell sa darating na araw. Karagdagan, asahan ang pagtaas ng kilay ni Keso sa pagpapalalim ng usaping nasa harap na bubukas sa salang pagtanggap ng donasyon sa mga kontraktor na galing sa sariling lukbutan ang ibinigay sa asawa ni Puso.
Salitang laway ang natanggap ng ilang bugok ng banggitin ni Wigman na “safe ka na” at ganap na walang laman. Ang nagaganap o naganap na pagdinig sa maghapon sa ngalan ng katotohanan na nagbanggit sa mga ngalan na sabit sa mga maanomalyang multong proyekto pauna lamang. Sa takbo ng pangyayari tila dadami ang sasabit sa mga multong proyekto na tuwiran na may ugnayan sa iba pang mababangit sa paglakad ng pag-uusisa. Ngunit, umaasa na itutuloy ang pagbuo ng “independent committee ” maghahain ng reklamo sa mga salarin na sangkot sa anomalyang nakita ni Jun Singhot ng mag-ikot ito sa kapuluan. Malinaw na pagbuo ng reklamo, paghahain ng kaso sa kung sino sino ang magaganap. Sa inilahad ng mga testigo sa usapin ang malakas na dahilan ng naglagay sa mga bugok na handle without care.
Maraming Salamat po!!!!!