Kap.Marlon ‘Marvelous’ Manalo, Sasabak sa $450k Qatar World Cup 10 -Ball C’ship

BALIK sa internasyonal na eksena ang kampeon sa snooker at bilyar na si Kap.Marlon “Marvelous Manalo ng Pilipinas upang ipakitang-gilas muli ang kanyang husay sa dadayuhang Qatar World Cup 10 Ball na gaganapin sa Oktubre 19–29, 2026 sa Ezdan Palace Hotel, Doha, Qatar.

Sasabak muli siya sa mundo ng bilyar matapos ang mahabang panahong hindi nakalaban, sa paglahok sa torneo na may kabuuang premyong $450,000, kung saan ang tatanghaling kampeon ay mag-uuwi ng malaking bahaging $100,000.

Noong edisyong 2024 ang huling action ni Manalo nang matalo siya sa iskor na 8–11 laban kay Mario He ng Austria, ngunit ipinakita ng kanyang pagganap ang kanyang pambihirang husay. Matapos ang mahabang pahinga, nakapasok pa rin siya sa huling 32 na kalahok, na nagpapatunay na kaya pa niyang makipagsabayan sa pinakamataas na antas ng kompetisyon.

Ang tanyag na manlalaro, dating pinuno ng Barangay Malamig, Lungsod ng Mandaluyong (dating tagapagsalita rin ng Liga ng mga Barangay sa Pilipinas at pangulo ng ABC ) ay hinangaan pa ng marami noong tinalo niyang mga kilalang manlalaro na sina Yang Ching-shun ng Taiwan, at mga kababayan niyang sina Efren “Bata” Reyes at Francisco “Django” Bustamante sa yugtong pangwakas ng World Pool Championship.

“Sana ay maging maayos ang aking performance sa darating na Qatar World Cup 10 -Ball sa Doha, Qatar na may kabuuang premyong $450,000,” pahayag ni Manalo,graduate ng kursong AB Economics sa Jose Rizal University.

Marami na siyang napanalunan sa US Pool Circuit at naging ikalawa kay Reyes noong 2004 World 8-Ball Championship sa Fujairah, United Arab Emirates.

“Ibibigay ko ang lahat ng aking alam sa larong bilyar,” dagdag ni Manalo, na nakakuha ng pilak na medalya sa snooker matapos maging ikalawa kay Bjorn Haneveer ng Belgium noong 2001 World Games sa Akita, Japan.

Kahit hindi siya masyadong nakilahok sa malalaking torneo nitong mga nakaraang taon, pinanatili ni Manalo ang kanyang hugis sa pamamagitan ng araw-araw na pagsasanay sa kanyang sariling bilyaran sa Talumpung, Mandaluyong, at sa kilalang Pacman’s Cue Club sa Lower Ground Floor, Worldwide Corporate Center, Shaw Boulevard, Mandaluyong City.
Kasama ni Manalo sa Ikalawang Yugto na itatakda sa Oktubre 24–29 ang kasalukuyang kampeon na si Jonas Magpantay, Bernie Regalario, Jefrey Roda, Carlo Biado, Aivhan Maluto, Albert James “AJ” Manas, at Jeffrey Ignacio.

Maaaring lumaki pa ang pangkat ng Pilipinas, dahil may 17 pang manlalarong Pilipino na nakatala sa Unang Yugto ng kwalipikasyon na magsisimula sa Oktubre 19. Kabuuang 16 manlalaro mula sa kwalipikasyon ang makakasali sa pangunahing torneo na may 128 na kalahok.