Pader at nitso sa sementeryo sa Batangas gumuho, mga buto kumalat

KUMALAT ang mga buto ng mga yumao nang masira ang mga nitso at ang bahagi ng pader sa isang sementeryo dahil sa paglambot ng lupa dulot ng pag-ulan sa Batangas City.

Sa ulat, limang bahay din sa tabi ng sementeryo ang bahagyang napinsala sa Barangay Kumintang Ibaba.

Ang paglambot ng lupa dahil sa mga pag-ulan ang nakikitang dahilan ng City Disaster Risk Reduction and Management Office kaya nasira ang mga nitso at ang pader.

Isang kaanak ng nakalibing sa sementaryo ang nagtungo sa lugar para alamin ang sitwasyon sa lugar.

Kabilang ang nitso ng kaniyang mahal sa buhay ang nasira at may nakita siyang mga buto pero hindi siya makatiyak kung buto ito ng kanilang yumao.

Makikipag-ugnayan ang CDRRMO sa tanggapan ng engineering at sanitation department para sa pagsasaayos ng sementeryo.

Kailangan din maabisuhan ang mga kaanak ng mga nakalibing sa sementeryo na nasira ang nitso.