Sen. Go sa publiko: Huwag mawalan ng pag-asa sa COVID-19 pandemic
Advertisers
UMAPELA si Senador Christopher “Bong” Go sa sambayanan na huwag mawawalan ng pag-asa sa gitna ng krisis na dulot ng COVID-19 pandemic.
Sinabi ni Go na bukas naman ang Duterte administration sa mga suhestiyon at kritisismo dahil nakakatulong ito para mapabuti pa nila ang serbisyo sa bansa.
Pero aniya kaakibat ng pagpuna ay dapat matutong tulungan na lang ang gobyerno para mapagtagumpayan ang laban kontra COVID-19.
Binigyang-diin ni Go na batid naman ng lahat na walang nakapaghanda sa pagdating ng COVID-19 pandemic kung saan maging ang mga mayayamang bansa ay wala ring nakahandang plano.
Dagdag ni Go, tanging kooperasyon lang naman ang hiling ng pamahalaan habang wala pang bakuna kontra sa COVID-19.
Kaugnay nito, binuweltahan ni Go ang mga kritiko ng pangulo dahil wala raw itong ginagawa kundi ang maghintay sa bakuna.
Giit ni Go, wala namang ibang puwedeng gawin ang pangulo kundi ang maghintay at pangunahan ang kampanya laban sa pagkalat ng virus sa bansa. (Mylene Alfonso)
