KAMARA UMAMIN: 98 COVID CASES ‘DI NAITALA SA LOCAL HEALTH OFFICE!

KINAILANGAN pang kalampagin ng Quezon City Epidemiology and Surveillance Unit (CESU) sa kanilang late reporting ng COVID cases ang House of Representatives bago ito ma-pressure at umamin na mayroong 98 confirmed COVID cases ang Kamara mula pa Nobyembre 10.
Sa isang press release na ipinalabas ng tanggapan ni House Speaker Lord Allan Velasco ay inamin nitong mayroong 98 confirmed cases ang Kamara. Ang mga ito ay base sa resulta ng kanilang isinagawang mass testing. Gayunpaman hindi nito idinetalye kung ilan ang apektadong kawani at ilan ang mga mambabatas.
Ang 98 confirmed cases ay hindi naka-report sa QC-CESU, paglabag sa itinatakdang 24 oras na reporting ng COVID cases. Kaya aminado ang virus surveillance unit ng lungsod na mahihirapan na sila ngayon sa gagawing contact tracing lalo at lumipas na ang 20 araw.
Ayon kay QC-CESU Director, Dr Rolly Cruz, tanging 40 cases lamang ang kanilang nasa listahan na pawang nagself-reporting. Ang mga nai-report na kaso na ito ang dahilan kung bakit nila kinalampag at hinihingan ng report ang Kamara dahil wala itong isinusumite sa tanggapan.
“Yung 40 cases na ito ay pawang nakatira sa mga barangay sa paligid ng Batasan Complex. Nang aming tanungin kung saan nila nakuha ang virus ay sa kanilang workplace sa Kamara. Inaalam natin ngayon kung itong 40 cases na nasa aming listahan na mga kawani ay kasama na sa 98 cases na dineclare ngayon lang ng Mababang Kapulungan o hiwalay pa ito,” paliwanag ni Cruz.
Aniya, kanila naring iimbestigahan kung saan at paano nakuha ng 98 confirmed cases ang virus. Kung ito ay pawang sa Kamara nakuha o sa ibang lugar at kung may batayan para ipasara pansamantala ang tanggapan.
Iginiit ni Cruz na dapat ay 24 oras lamang ay nai-report na ang COVID cases para sa gagawing contact tracing. Subalit sa kaso ng Kamara ay tumagal ito. Aniya, magsusumite sila ng report sa Department of Health (DOH) ukol sa kanilang magiging findings sa dahilan ng late reporting ng Mababang Kapulungan.
Ang 98 confirmed cases sa buwan ng Nobyembre ng Kamara ay hiwalay pa sa nauna nang 80 COVID cases na naitala simula Marso 2020 kungsaan 2 mambabatas at 3 empleyado ang nasawi.
Samantala, hindi naman nagpaliwanag ang Kamara ukol sa late reporting na kanilang COVID cases na nagresulta para maging huli narin ang gagawing contact tracing.
Isinisi naman ng mga kawani ng Kamara ang paglobo ng mga kaso ng COVID cases sa ahensya sa hindi istriktong pagsunod sa quarantine protocol mismo narin ng House Leaders.
Tinukoy ng mga ito sina Speaker Velasco, Deputy Speaker at 1Pacman Partylist Rep. Mikee Romero at House Secretary-General Dong Mendoza na lumabag sa quarantine protocol nang patuloy parin itong pumapasok sa Kamara sa kabila ng kanilang exposure sa COVID positive na si TESDA Chair Isidro Lapeña sa isang dinner.
Sinabi ni Romero na nagnegatibo sila sa test matapos na ma-exposed kay Lapeña ngunit hindi naman ito sumailalim sa 14-day quarantine dahil nakita itong dumadalo sa mga hearing at courtesy call sa Kamara.
Ipinaliwanag ni Health Undersecretary Maria Rosario Vergeire na kailangan ang quarantine sa mga may direct exposure sa isang COVID patient kahit paman nagnegatibo sa test dahil ang virus ay maaaring mag-develop sa pagitan ng dalawa hanggang 14 araw pagkatapos ng exposure.
Bukod sa paglabag sa quarantine ay nilabag din ng House leaders ang guidelines ng DoH-IATF na nagtatakda na hanggang 10 katao lamang ang gathering. Maliban sa 5 House leaders at kay Lapeña ay kasama rin sa dinner meeting sina Defense Secretary Delfin Lorenzana, Information Sec. Gregorio Honasan, Environment Sec. Roy Cimatu, National Security Adviser Hermogenes Esperon, National Task Force Against COVID-19 Chief Carlito Galvez at Social Welfare and Development Sec. Rolando Bautista.
Minaliit din ng mga kawani ang ginawang mass testing dahil maliit na porsiyento lamang ito. Nasa 8,000 umano ang kawani ng Kamara, ngunit 2,000 lang ang isinailalim sa pagsusuri.