Pagbabakuna ng Pfizer vaccine para sa mga edad 5 – 11 binigyan na ng EUA

APRUBADO na ng Food and Drug Administration (FDA) ang pagbibigay ng emergency use authorization ng bakuna kontra COVID-19 na gawa ng Pfizer para gamitin sa mga bata na nag-eedad 5 hanggang 11-taong gulang.

Sinabi ni FDA Director General Eric Domingo sa Laging Handa Public briefing, na 90.7 porsyentong epektibo ang Pfizer para sa mga bata.

“Upon review of technical documents and evaluation of the US (United States) FDA recommendations, our experts have found that the data submitted is sufficient for the EUA approval Nakita naman po natin na it is reasonable to believe that the vaccine may be effective to prevent COVID-19 and the benefits of vaccination outweigh the known and potential risks,” pahayag ni Domingo.

Tiniyak pa ni Domingo na mild lamang ang naging adverse effects ng Pfizer sa clinical trials sa mga bata na nag-eedad lima hanggang 11-taong gulang.

Paglilinaw ni Domingo, iba ang dosage sa mga bata kumpara sa mga matatanda.

“Ito po ay mas mababang dosage at hindi lamang po ‘yun, ‘yung concentration din po nung vaccine ay mas mababa rin po kaysa du’n sa ginagamit sa adults ngayon,” pahayag ni Domingo.

Pahayag ni Domingo, inabisuhan na ng kanilang hanay sina Vaccine Czar Sec. Carlito Galvez at Health Secretary Francisco Duque III na bumili ng hiwalay na bakuna ng Pfizer.