Paglagda ni PRRD sa Excellence in Teacher Education Act, pinuri ni Sen. Go

PINURI Pinuri ni Senator Christopher “Bong” Go si Pangulong Rodrigo Duterte sa paglagda sa Republic Act No. 11713, mas kilala bilang Excellence in Teacher Education Act of 2022.

“Teachers play a critical role in ensuring the continued delivery of learning and ensuring a brighter future for our children, as the country continues its battles against COVID-19. That is why I want to commend President Duterte for prioritizing the welfare of our educators,” idiniin ni Go.

“Alam kong napakahirap ng buhay ngayon kaya dapat patuloy nating ibigay ang nararapat na suporta sa ating mga guro, lalo’t nasa gitna pa tayo ng krisis. Kung gusto natin umunlad ang educational sector, bigyan natin ng karampatang suporta at importansya ang mga guro,” dagdag niya.

Ang batas ay naglalayong alagaan ang mga tagapagturo ng bansa upang matiyak na sila ay naihahanda sa paglikha ng isang mas kaaya-aya at epektibong kapaligiran sa pag-aaral para sa mga mag-aaral. Ang batas ay dapat makabuluhang mapabuti ang sektor ng edukasyon sa pamamagitan ng pagbabago sa Teacher Education Council (TEC) at pagbuo ng mga kinakailangang programa sa iskolarsip para sa mga naghahangad na guro.

Ipinag-uutos din nito ang pagtatatag ng Teacher Education Centers of Excellence (Teacher Education-COEs) sa mga estratehikong lugar sa lahat ng rehiyon ng bansa, kasunod ng mga standard criteria.

Ang mga layunin at tungkulin ng Teacher Education-COEs ay magsagawa ng mga makabago at nauugnay na pre-service at in-service na mga programa sa edukasyon at pagsasanay ng guro, kabilang ang mga alternatibong delivery program na magde-develop at magpoprodyus ng guro na makapaghahatid ng dekalidad na edukasyon.

“Habang ang mga kabataan ang pag-asa ng ating kinabukasan, napakaimportante po talaga na pangalagaan natin ang ating mga guro dahil sila po ang pangunahing maghuhulma sa ating mga kabataan,” giit ng senador.

“Huwag natin pababayaan ang ating mga guro. Nais ko rin magpasalamat sa aking mga kasama sa Senado, kay Senator Win Gatchalian dahil talagang maraming matutulungan ang aming ipinanukalang batas,” anang mambabatas.

Isa rin si Go sa co-authors ng Republic Act No. 11510 o ang Alternative Learning System (ALS) Act of 2021 na nagpapahusay sa paghahatid ng basic education sa underrepresented at disadvantaged na mga mag-aaral.

Ang ALS Law ay nagbibigay sa mga mag-aaral ng mga espesyal na programa at alternatibong pamamaraan sa edukasyon na hindi magagamit sa ilalim ng pormal na sistema ng pag-aaral.