Erwin Tulfo, 4 pang bagong gabinete itinalaga ni Marcos Jr.

ITINALAGA ni Incoming President Ferdinand “Bongbong” Marcos Jr. ang lima pang mga bagong gabinete sa kaniyang administrasyon.

Ito ang kinumpirma ni incoming Press secretary Trixie Angeles sa isang presscon na ginanap sa BBM Headquarters, Lunes ng hapon.

Ayon kay Cruz-Angeles kabilang sa magiging parte ng susunod na administrasyon sina Maria Zenaida Angping, bilang kalihim ng Presidential Management Staf; Christina Frasco, kalihim ng Department of Tourism; Amenah Pangandaman, kalihim ng Department of Budget of Management; Ivan John Enrile Uy, kalihim ng Department of Information and Communications Technology; at Erwin Tulfo, kalihim ng Department of Social Welfare and Development

Si Angping ay dating kongresista ng ikatlong distrito ng Maynila simula 2007 hanggang 2016.

Si Frasco naman ay tagapagsalita ni Vice President-elect Sara Duterte-Carpio. Nanalo rin si Frasco bilang alkalde ng Liloan, Cebu sa nagdaang eleksyon.

Samantala, nagsisilbi naman si Pangandaman bilang assistant governor sa Bangko Sentral ng Pilipinas.

Habang Chairman si Uy ng dating Commission on Information and Communications and Technology sa adminitrasyon ni dating Pangulong Benigno ‘Noynoy’ Aquino III.

Kilala naman si Tulfo bilang broadcaster. Maliban sa pagiging veteran journalist, kilala rin si Tulfo sa pagtulong niya sa pamamagitan ng “Action Center” para sa mga mahihirap.

Lahat ng Cabinet nominees ay kailangan pang makakuha ng kumpirmasyon mula sa Commission on Appointments (CA). (Vanz Fernandez)