BIR: BIGTIME ONLINE SELLERS ANG TARGET

KLINARO ni Bureau of Internal Revenue (BIR) Commissioner Lilia Guillermo na ang mga big-time online sellers lamang ang hahabulin ng ahensya.

Ito ang sagot ni Guillermo matapos sabihin ng isang senador sa BIR na habulin ang mga smuggler, sa halip na mga maliliit na social-media influencers at sellers.

Ayon kay Guillermo, sa mga susunod na linggo muli nilang sisimulan ang pagsubaybay sa mga nagbebenta online, partikular sa mga shopping app.

Sinabi pa ng komisyoner na hahabulin lamang nila ang malalaking nagbebenta, at humingi siya ng tulong sa mga malalaking online app.

Bagama’t hindi siya nagbigay ng mga detalye kung ano ang bumubuo sa isang malaking online selling, sinabi niya na ang social media ay maraming data na maaari nilang kolektahin, kabilang ang bilang ng mga likes and followers.

Ibinulgar din niya na magsasagawa ng summit ang BIR kasama ang mga malalaking online app sa Setyembre para pag-usapan ang posibleng partnership para matukoy ang app na malaking mga nagbebenta.

Dagdag pa nito, na maaari silang mag-tap sa sistema ng mga online provider.

Idinagdag ng BIR chief na sisimulan nila ang digitalization efforts kaya naman sinanay na nila ang ilang statisticians para maging data scientist o cybersecurity expert.

Inamin niya na mahirap sa ngayon na kumuha ng mga eksperto dahil wala pang plantilla positions, kaya magsasanay sila sa loob o kukuha ng mga consultant.