Kahit ni-relax ang ‘mask wearing policy’… BONG GO: MAGSUOT PA RIN NG FACE MASK

INIHAYAG ni Senator at Senate committee on health chair, Christopher “Bong” Go na bagama’t iginagalang niya ang desisyon ng gobyerno na i-relax ang regulasyon sa pagsusuot ng face mask sa mga pampublikong lugar, patuloy siyang umaapela sa mga Pilipino na sundin ang mga protocol sa kalusugan at magpabakuna laban sa COVID-19, kasama ang mga booster shot.

“I’m sure pinag-aralan po ito ng ating IATF (Inter-Agency Task Force for the Management of Emerging Infectious Diseases) headed by the Department of Health… It’s based on good science naman always. Every month, every week, pinag-aralan naman ng ating gobyerno ‘yan. Suportado ko po ito,” ani Go sa isang ambush interview sa Senado.

“Ngunit bilang committee chair on health, hinihikayat ko pa rin ang ating mga kababayan na huwag maging kumpiyansa. Habang nandiyan si COVID, delikado pa rin po ang panahon. Wala naman sigurong mawawala sa atin kung susuotin po natin ang ating mga face mask. Mas mahirap pong magkasakit, sa totoo lang po,” dagdag niya.

Noong Lunes, nilagdaan ni Pangulong Ferdinand Marcos Jr. ang Executive Order No. 3, na ginagawang opsyonal ang pagsusuot ng mga mask sa mga bukas na espasyo, o hindi mataong lugar na may magandang bentilasyon. Gayunpaman, ang mga senior citizen at immunocompromised na indibidwal ay lubos na hinihikayat na magsuot ng kanilang mga face mask.

“Kaya lang po, paalala ko lang sa mga kababayan natin, ‘wag pa rin pong maging kumpiyansa. Nasa atin naman ‘yan, nasa Pilipino naman ‘yan. Voluntary ang pagsusuot ng face mask, katulad ninyo nasa inyo naman ang desisyon kapag lumabas kayo at magsuot ng face mask para naman ito sa inyong proteksyon,” ani Go.

Nauna nang binanggit ni Secretary Benhur Abalos ng Department of the Interior and Local Government na ang Pilipinas at Myanmar ang mga huling bansa sa ASEAN na nag-uutos pa rin sa paggamit ng mga mask sa labas.

Binanggit din ni Abalos na ang pagtanggal ng mask mandates sa ibang bansa ay hindi nagresulta sa pagtaas ng kaso ng COVID-19 hanggang ang publiko ay patuloy na sumusunod sa health protocols.

Samantala, binigyang-diin ni Go ang pangangailangan na paigtingin ang information campaign sa pagpapalakas ng mga bakuna upang mahikayat ang mas maraming Pilipino na tumanggap nito.

“Ang nangyayari kasi ngayon, kulang ‘yung information drive natin na ipaintindi sa mga kababayan natin na kulang pa rin, hindi pa sapat ang initial two doses,” sabi ng senador.

“Hindi naman po lahat ng mga kababayan natin ay (nakakapag-test) ng antibodies (laban sa COVID-19). ‘Yung iba nakapagpa-booster… (Pero) yung ibang mga kababayan natin na hindi, nagiging kumpiyansa na po,” paliwanag ni Go.

Inulit ni Go ang kanyang pakiusap sa gobyerno na mag-alok pa ng mga insentibo sa mga indibidwal na nakatanggap ng lahat ng kanilang inirekomendang pagbabakuna at booster doses upang mahikayat ang mas maraming Pilipino, lalo na ang mga nag-aalangan pa, na kumuha ng kanilang COVID-19 vaccines.