SERAFICA KULONG SA IMPORTATION NG ASUKAL

HINATULAN ng ‘guilty’ sa kasong ‘indirect contempt’ ng Himamaylan City Regional Trial Court Branch 55 sa Negros Occidental ang kontrobersiyal na dating Sugar Regulatory Administration (SRA) chief na si Hermenegildo Serafica.

Kaugnay ito sa pag-issue ni Serafica ng ‘Memorandum Circular 11’ na nagpahintulot sa sugar importation kahit ipinahinto na ng Korte.

Sa 11-pahinang desisyon ni RTC Branch 55 Judge Walter Zorilla, pinatawan si Serafica ng 12 araw na pagkakabilanggo at multang P30,000.

Matatandaan na Mayo 4 nang ilabas ni Serafica ang memorandum na nagpahintulot na ipagpatuloy ang implementasyon ng sugar order number para sa importasyon ng 200,000 metric tons ng standard grade at bottler’s grade refined sugar, sa kabila ito ng ‘Writ of Preliminary Injunction’ na inilabas ng Korte noong Marso 2 upang pigilan ang pagpapatupad ng Sugar Order Number 3.

Ang nasabing injunction ay may kaugnayan sa petisyon ng Negros Occidental Federation of Farmers Association na tumutol sa pag-aangkat ng asukal sa ilalim ng mga nasabing kautusan ng SRA.