2 African nationals hinarang sa NAIA

Dalawang African nationals na umanoy’s nagtangkang pumasok sa bansa gamit ang pasaporte bilang Canadian citizens and hinarang ng mga tauhan ng Bureau of Immigration (BI) sa Ninoy Aquino International Airport (NAIA) Terminal 3.

Kinilala ni Immigration Commissioner Norman Tansingco ang dalawang dayuhan na sina Adraman Issa Mariam at Halime Abba Souleymane, na kapwa mula sa Central African Republic of Chad.

Batay sa ulat na tinanggap ni Tansingco mula kay BI port operations chief Atty. Carlos Capulong, dumating ang nasabing mga dayuhan noong Setyembre 25 lulan ng Emirates flight EK 336 mula Dubai.

Nang dumaan sa immigration counters ang dalawang dayuhan ay nagpakita umano ang mga ito ng Canadian passports na natagpuang peke nang sumailalim sa BI forensic documents laboratory.

“Apparently, they attempted to conceal their true nationality in the belief that they would be allowed entry into the country without being subjected to strict inspection by our officers. They are wrong to assume that such documents can pass as legitimate,” ani Capulong.

Ipinag-utos ni Tansingco na agarang isama sa immigration blacklist ang dalawang dayuhan upang hindi na makapasok ang mga ito sa Pilipinas sa hinaharap matapos na agad ding pinabalik ang mga ito sa pinanggalingang bansa.

“I commend our officers at the NAIA for a job well done. Due to their vigilance, we were able to frustrate the intentions of these undesirable aliens to gain illegal entry into our country,” ani Tansingco. (JERRY S. TAN/JOJO SADIWA)