RT-PCR test result ‘di na kailangan sa mga biyahero at turistang bakunado na pupunta sa Pinas

INIHAYAG ng Department of Tourism (DOT) na inalis narin ang pag-oobliga sa mga biyahero at turistang bakunado na tutungo sa Pilipinas na magpakita ng RT-PCR negative test results.

Ayon kay DOT Secretary Christina Frasco, isa ito sa napag-usapan sa isinagawang Cabinet meeting sa Malakanyang kasama si Pangulong Ferdinand “Bongbong” Marcos Jr. nitong Martes.

Habang obligado naman na magpakita ng antigen test result na kinuha 24 oras bago ang pagdating sa Pilipinas ang hindi bakunadong biyahero o turista.

Samantala, inalis na rin ng pamahalaan ang One Health Pass at pinalitan ng E-arrival platform para mas maging magaan at mabilis ang biyahe.

Sinabi ni Sec. Frasco, sasagutan lamang ang sampung tanong para magkaroon ng E-arrival card.