US Vice Pres. Harris nag-courtesy call kay PBBM

NAGKAHARAP nitong Lunes sa Malakanyang sina Pangulong Ferdinand “Bongbong” Marcos Jr. at US Vice President Kamala Harris.

Sa kanilang pag-uusap sa palasyo, sinabi ng pangulo na ang pagbisita ni Harris ay patunay ng malakas na relasyon sa pagitan ng Pilipinas at Amerika.

Binigyang-diin ng pangulo na hindi niya nakikita na may pakikipag-ugnayan ang Pilipinas na hindi kasama sa konsiderasyon ang Amerika.

Sinabi pa ng punong ehekutibo na una pa man ay sadyang matatag at malakas na ang relasyon ng Pilipinas at Estados Unidos sa usapin ng politika, ekonomiya, depensa at seguridad.

Pabiro pang sinabi ng pangulo na mabuti namang bibisita si Harris sa Palawan, pero umaasa siyang sa mga resort lamang doon ang dadayuhin nito, kung saan parehong natawa ang dalawang opisyal.

Ayon kay Harris, malaki ang pasasalamat niya sa mainit na pagtanggap ng Pilipinas.

Sa seryosong panig, sinabi naman ng pangalawang pangulo ng America na suportado nila ang Pilipinas sa usapin ng international rules partikular na sa isyu ng West Philippine Sea. (Vanz Fernandez)