$10-B NAKUHA NI PBBM SA JAPAN

AABOT sa $10 bilyong halaga ng investment ang nakuha ni Pangulong Ferdinand “Bongbong” Marcos Jr. mula sa limang araw na working visit sa Japan.

Sinabi ni Trade Secretary Alfredo Pascual, nangangahulugan ito ng P550 bilyon at libu-libong trabaho.

Ayon pa kay Pascual, nasa bola na ngayon ng Pilipinas kung paano pananatilihin pa sa bansa ang mga dayuhang negosyante.

“Pero ang complaint pa rin nila mabagal. Long time ago, we have held on the ball. We need to shoot the ball now and make a score. Let’s not drop the ball,” ani Pascual.

Ito aniya ang dahilan kung kaya patuloy na pinagsusumikapan ni Pangulong Marcos na madaliin ang proseso ng pagnenegosyo sa Pilipinas.

Halimbawa na ang itatayong “Green Lane” kung saan naging simple at madali ang pagproseso ng mga requirements ng mga dayuhang mamumuhunan.

Sa ngayon aniya, wala namang siyang naririnig na reklamo sa mga dayuhang mamumuhunan maliban sa mabagal na proseso ng papeles.

Pagtitiyak ni Pascual, agad na mararamdaman ng taong bayan ang mga naiuwing investment ni Pangulong Marcos.

Kumpiyansa si Pascual na marami pang investment na makukuha ang Pangulo lalo’t matagal pang matapos ang taon.

Nasa buwan pa lamang aniya ng Pebrero pero bilyong halaga na ng investment ang nakuha ng Pangulo.