2 dating opisyal ng DA kulong hanggang 60 years sa fertilizer fund scam

DALAWANG dating regional officials ng Department of Agriculture (DA) ang hinatulan makulong ng hanggang 60 years sa kasong graft na may kaugnayan sa 2004 fertilizer scam.

Sa 38-page decision na ipinahayag nitong Marso 29, 2023 ng Sandiganbayan Sixth Division napatunayan na si Francisco Casil, dating Bids and Awards Committee chairman at chief administrative officer ng DA-Regional Field Unit 1 (Ilocos region); at Lourdes Gonzales, dating DA-RFU 1 budget officer at BAC member, ay guilty ng 6 counts sa bawat paglabag sa Section 3 (e) ng Republic Act 3019 (Anti-Graft and Corrupt Practices Act).

Sila’y hinatulan makulong ng hindi bababa sa 6 taon at di lalagpas sa 10 taon sa bawat bilang ng kaso, na may kabuuan 36 hanggang 60 taon na pagkakulong para sa 6 counts.

Hindi narin sila pinapayagan makapagtrabaho sa public office.

At inatasan silang ibalik sa DA-RFU1 ang kabuuang P3.414 million, ang kabuuang halaga ng pondo na ginamit sa maanomalyang pagbili ng abono.

Samantala, ang mga kaso laban sa primary accused, dating DA-RFU1 executive director Reinerio Belarmino Jr. ay inilagay sa archived dahil hindi pa ito natatagpuan.

Isinampa ang kaso ng Office of the Ombudsman noong 2018, ang nga kaso ay nag-ugat noong 2004 sa pagbili ng liquid fertilizers – 2,166 bottles mula sa Farmate International Technologies Inc. at 584 bottles mula sa Central Luzon Farmers Agro Center noong 2004.