Hepe ng Mandaluyong Police ‘adik’

SINIBAK na sa puwesto ang hepe ng Mandaluyong City Police nang magpositibo sa random drug test, base na rin sa kumpirmasyon ni Eastern Police District Director Brigadier General Wilson Asueta.

Sinabi ni Asueta na isinailalim din sa administrative charges si Mandaluyong City Police chief Colonel Cesar Gerente.

“He is given 15 days to challenge the drug test result,” ani Asueta.

Isinagawa ang random drug test ng National Capital Region Police Office (NCRPO) sa pagsisikap na linisin ang Metro Manila mula sa mga walang prinsipyong tauhan ng pulisya.

“I will not tolerate scalawags in NCRPO especially those who are involved in illegal drug activities.

Sinisiguro kong may kalalagyan kayo,” ani NCRPO acting regional director Jose Melencio Nartatez.

“Patuloy ang NCRPO sa paglilinis sa aming hanay para sa tapat at marangal na serbisyo ng publiko,” dagdag pa ni Nartatez.

Samantala, si PCol. Mary Grace Madayag ang itinalaga bilang acting chief ng Mandaluyong City Police.