Wanted na aktibo at dating pulis timbog

NAARESTO ng mga elemento ng Philippine National Police – Integrity Monitoring and Enforcement Group (IMEG) ang isang aktibo at dating pulis na kapwa wanted sa magkahiwalay na operation sa Tuguegarao City, Cagayan Valley at Montalban, Rizal.

Kinilala ang mga inaresto na sina Patrolman Adrian France Balderas, 24 anyos, active PNP member; at ex-Corporal Jayvee Rommel A. Vicencio, 29, isang AWOL (Absent Without Official Leave).

Ayon kay Brigadier General Warren de Leon, hepe ng PNP-IMEG, sumasailalim si Balderas sa BISOC training sa RSTU-2 (Training Ground) PRO2, Camp Marcelo A Adduru, Dadda, Tuguegarao City, Cagayan Valley nang inaresto Oct. 5, 2023 sa bisa ng warrant of arrest sa kasong paglabag sa Anti-Violence against Women and their Children Act at may piyansang P72,000 sa korte sa Roxas, Isabela.

Ipinagharap si Balderas ng reklamo ng kanyang ex-girlfriend na hindi pinangalanan nang sumasailalim ito sa field training phase sa Cauayan City noong 2021 dahil sa psychological abuse.

Nakakulong ngayon si Balderas sa Taguegarao City Police Station.

Naaresto naman si Vicencio sa East Bellvue, San Isidro, Montalban, Rizal Oct. 9, 2023.
Inaresto si Vicencio sa warrant of arrest sa kasong murder mula sa sala ni Judge Rosalia I Hipolito -Bunagan, Presiding Judge, Regional Trial Court, National Capital Judicial Region, Branch 232, Caloocan City noong March 13, 2023.

Si Vicencio ang suspek sa pagpatay kay Pat. Jefferson Valencia July 4, 2022 sa Caloocan City.(Mark Obleada)