EX-IMMIGRATION OFFICIAL 9 TAON KULONG SA PAMEMEKE NG TRAVEL DOCS!

HINATULANG makulong ng korte ang dating opisyal ng Bureau of Immigration (BI) kaugnay ng pamemeke ng travel documents ng isang Austrian fugitive tatlong taon na ang nakararaan.

Sa pahayag ng National Bureau of Investigation (NBI), si dating BI supervising officer Marcos Nicodemus ay hinatulan makulong ng hanggang 9 taon nang mapatunayan ng Pasay City Regional Trial Court Branch 111 na nagkasala sa kasong paglabag sa Republic Act (RA) 10175 (Cybercrime Prevention Act of 2012) at RA 3019 (Anti-Graft and Corrupt Practices Act).

Nag-ugat ang kaso nang atasan ni Nicodemus si Immigration officer Darren Ilagan noong Agosto 2020 na palsipikahin ang travel record ni Jan Marsalek, isang Austrian businessman na matagal nang pinaghahanap ng batas dahil sa pagkakasangkot sa nawawalang US$2 bilyon sa German payment processing company na Wirecard.

Sa testimonya ni Ilagan, inutusan siya ni Nicodemus na ilagay sa dokumento na dumating sa bansa si Marsalek Hunyo 23, 2020 sa pamamagitan ng pagdaan sa Ninoy Aquino International Airport Terminal 1.

Gayunman, nakatatak sa travel records ni Marsalek ang “cancelled by user” at nakasaad na dumating ito ng bansa Hunyo 24, 2020 via Mactan-Cebu International Airport (MCIA).

Nabisto ng NBI-International Airport Investigation Division na hindi pumasok ng bansa si Marsalek at hindi rin ito lumabas ng Pilipinas sa pamamagitan ng pagdaan sa MCIA.

Pinaniniwalaang nagtatago sa Russia si Marsalek na patuloy parin pinaghahanap ng International Airport Investigation Division (Interpol).