DILG: SK CHAIR BAWAL MAGTALAGA NG KAMAG-ANAK

BINALAAN ni Department of Interior and Local Government (DILG) Secretary Benhur Abalos, Jr. ang mga bagong halal na mga opisyal ng Sangguniang Kabataan (SK) sa pagtatalaga ng kanilang mga kamag-anak bilang treasurer at secretary.

Ayon kay Abalos, naglabas siya ng DILG Memorandum Circular (MC) 2023-167 na ipinagbabawal ang ‘nepotismo’ o pagtatalaga ng SK officials ng kanilang kamag-anak hanggang 2nd civil degree sa puwesto bilang treasurer at secretary.

Aniya, kailangan magtalaga ang SK officials ng kanilang kalihim at treasurer sa loob ng 60 araw, at dapat ang mga ito ay residente ng kanilang barangay at may kasanayan sa gagawing trabaho.

Giit ni Abalos, dapat isipin ng SK officials ang circular dahil dito nakasalalay ang kanilang kredibilidad.

“Kaya mahalagang simulan nila ito [appointment] ng tama. Bawal ang kamag-anak system sa pag-appoint ng SK secretary at treasurer,” diin ng kalihim.

Dagdag ng DILG chief, obligado ring dumalo sa SK mandatory training ang SK officials upang magkaroon ng sapat na kaalaman sa responsibilidad ng mga ito sa kanilang barangay. (Almar Danguilan/Ernie dela Cruz)