‘INSIDE JOB’ ANG SUNUD- SUNOD NA SKYWAY ROBBERY – PNP

NAGSASAGAWA na ng malalimang imbestigasyon ang Philippine National Police (PNP) hinggil sa sunud-sunod na kaso ng robbery-holdup sa skyway kamakailan.

Ito ang inihayag ni PNP Public Information Office Chief, Colonel Jean Fajardo, makaraang maaresto ng National Capital Region Police Office (NCRPO) operatives ang dalawang suspek.

Ayon kay Fajardo, partikular sa mga tinututukan ng pulisya ay ang anggulong “inside job” dahil lumalabas na natiktikan ang mga dayuhang biktima na may bitbit na malaking halaga ng pera mula sa isang casino.

Ang modus: iipitin ang sasakyan ng biktima sa skyway at bababa ng sasakyan ang mga salarin na may bitbit na palakol para ipambasag sa sasakyan ng biktima.

Sa nasabing insidente, nakuha sa mga biktima ang perang nagkakahalaga ng P134 million na posibleng panalo ng mga ito sa casino.

Nahuli sa bisa ng search warrant ang mga suspek na kinilalang sina Ando Sardoma sa Malate, Maynila at pinsan nito na si Joland Cabotaje na naaresto naman sa Cavite.