Kauna-unahang Information Warfighter Exercise isinagawa ng AFP at US military sa Pinas

NAGSAGAWA ng kauna-unahang Information Warfighter Exercise (IWX) ang Armed Forces of the Philippines (AFP) kasama ang United States military na nagsimula noong Abril 1 hanggang Abril 5, 2024 sa Camp Aguinaldo, Quezon City.

Layon ng ehersisyo para palakasin ang interoperability sa pagitan ng AFP at US information operations planners.

Nagbibigay din ito ng kakayahan sa AFP para pahusayin pa ang kakayahan sa Information Operations (IO).

Ang mga pangunahing ahensyang nagpapatupad ng batas tulad ng Philippine National Police (PNP) at Philippine Coast Guard (PCG) ay aktibong nakikibahagi sa pagsasanay, na binibigyang-diin ang komprehensibong saklaw at kahalagahan nito sa pagpapalakas ng mga estratehiya sa pagtatanggol ng bansa.

Ang nasabing ehersisyo ay itinuturing na brainchild ng Marine Corps Information Operations Center na naka base sa Quantico, Virginia.

Ang Information Warfare Exercise ay nangunguna sa mga makabagong pamamaraan ng pagsasanay sa Information Operations.

Gumagamit ng isang matrix-style wargame framework, ang ehersisyo kung saan nilagyan ang mga kalahok ng mga kinakailangang kasanayan upang mag-strategize at magsagawa ng mga operasyon sa loob ng mga kumplikado at kontemporaryong kapaligiran ng impormasyon.

Ayon sa Armed Forces of the Philippines (AFP) naging makasaysayan ang nasabing ehersisyo dahil ginanap ito sa labas ng United States.

Dagdag pa ng Sandatahang Lakas ng Pilipinas, isinama na rin ito sa Balikatan Exercise 39-2024, hindi lamang binibigyang-diin ang hindi natitinag na pangako ng dalawang bansa sa pagtutulungang pagsisikap sa pagtatanggol kundi nagsilbi din itong isang makabuluhang milestone sa tumatagal na partnership sa pagitan ng Pilipinas at US.