NAKAKAUMAY…NGUNIT… SINO?

MATAGAL ng bumaba sa puno ng Balite ang lider mula sa kaTimugan ngunit pakiramdam nito’y nasa dulo ng daliri ang liderato na minsang natanganan. Sa nahawakang kapangyarihan tila nalason ng kasakiman at ibig magpatuloy sa masarap na buhay ng nakaraan sa kasalukuyan. Sa basbas na ibinigay sa mga nakaraang halalan sa mga alipores na mangmang, nagpapatuloy sa pagkumpas ang oslang lider higit kung paano gagalaw sa pagyugyog ng kaayusan ng bansa para sa sariling pakinabang. Dahil minsan naging lider ng bansa, walang pagsisino kahit sino ang masagasaan maging ang kasalukuyang liderato na ‘di sang-ayon sa ibig.

Ang pakiramdam ni Totoy Osla na siya ang susi sa pagkakahalal ng kasalukuyang lider. At walang habas kung batikusin higit sa paggamit ng bawal na gamot. Ang panunuya’y halos ipinagkibit balikat lang ng kasalukuyang pangulo ngunit ‘di ng asawang may angking galing. Sa pagpasok sa larangan ng pamamahala ng asawa ni Jun Singhot, naging masalimuot ang relasyon ng kaTimugan na hindi pinalampas ang bawat pahayag at kilos ng katambal ng asawa sa halalan.

Sa totoo lang, nagpapaligsahan ang magkatambal kung papogi sa bayan ang basehan ng galaw, ngunit alam na kung sino ang may bentahe. Sa paligsahang ng mga hunghang, hindi malakas ang pagtugon ng kasalukuyan ngunit may diin at tila narito ang huling halakhak higit sa pagdating ng sakdal na dahilan ng pagka-aburido ng kaTimugan. Silip ang paggamit ng salapi ng kaTimugan sa mga pagtitipon na pilit minamaliit bilang pagsasabi ng katotohanan sa galaw ni Jun Singhot. Pilit binabalikan sa mga pahayag ang nakaraan sa paggamit ng bawal na gamot gayong may katagalan ng nangyari. May bago bang impormasyon? Sa akusasyon laban kay Jun Singhot, kumumpas si Totoy Osla sa mga alipores na mag-usisa at palalimin ang bangit na paggamit ng bawal na gamot ng pangulo sa pagpapatawag ng mga taong maka pagdidiin sa dating gawi ng kasalukuyang lider. Sa pagpapatawag ng mga taong may kaalaman sa mga akusasyon tila gapi sa puntong bangit si Jun Singhot. Sa pag-uusisa, pinangungunahan ni Mang Nano ng senado at pinatawag ang ilang retiradong pulis na malapit kay Osla. Masasabing lutong Makaw ang timpla sa pag-uusisa, sige lang, malapit na ang Hunyo o Hulyo at tatawa si Lizarda sa pagdating ng maghahain ng mandamyento.

Sa nalalapit na indulto sa kaTimugan, hindi tumitigil ang grupo ng Inferior Dabaw Group (IDG) sa paglalahad ng mga nakakainsultong pahayag laban sa pangulo. Walang tigil ang bibig sa media at social media sa paghahasik ng akusasyon na malinaw upang palambutin ang kapit sa timon ng kasalukuyang namamahala. Umaasa ang IDG na sa mga pahayag na bangit magigising ang bayan sa katinuan ng pagkatao ni Jun Singhot higit sa pamamalakad sa bayan. Silip na ibig patalsikin ang pangulo at makapalit si Inday Siba na ang tanging ambag sa kagawarang tinanganan ay pagwaldas ng pondo. Ang maipakita ang anak bilang lider ang magseselyo na ‘di magaganap ang bangungot na dulot ng bigong laban sa droga. Subalit, nariyan si Lizarda at tinutugunan ang kilos ni Inday Siba na naglalaway sa upuan ng asawa. Sa kilos ni Lizarda malayong maibabalik ang maayos na relasyon ng tambalan higit sa nakitang pagsang ayon ni Inday Siba sa mga pahayag ng ama.

Ang hilahang paakyat at pababa ng magkasamang magkaribal higit sa paghawak sa timon ng pamahalaa’y tunay na nakakaumay. Hindi makitaan ng gawang may pakinabang si Mang Juan at ang bayan. Walang usapang pambayan na may kapakinabangan sa buhay ng nakararami sa darating na panahon. Si Mang Juan at ang baya’y patuloy na umaasa sa walang laman na programa na naglalayo ng kabuhayan sa mayroon at tulad niyang wala. Hindi makita ni Mang Juan ang liwanag dahil sinarahan ang lagusan ng kweba para sa tulad niyang mahirap. Dahil pansarili ang kilos at pahayag sa ngalan ng bayan. Ang mabigat sa dulo ng kweba, nariyan na ibig bumalik sa liderato sa ngalan ng usaping mandamyento. Masasabing walang puwang sa puso ng dati at kasalukuyang lider ang kagalingan ng tao sa laylayan.

Sa totoo lang, umay na ang magsulat hinggil sa mga gawa ng lider pulitikal sa bansa dahil madalas na nakasentro sa kapalpakan ng liderato. Walang makitang pag-unlad sa buhay ng ordinaryong Pinoy kahit sa kanya nakatutok ang programang pinaglalaanan ng salaping bayan. Trilyon piso ang pondong inilalaan para sa programa ng bayan subalit pagbaon sa kahirapan ang kaganapan at walang pag-unlad. At sa pagsunod sa kagalingan ng bayan, pakinabang ng iilan ang sinasabing pag-unlad na naglalayo sa kalagayan ng kabuhayan. Sa totoo lang, hindi makalalapit ng tuwiran ang tulad ko, tulad ni Mang Juan ni Aling Marya sa tulad nina Inday Siba, Lizarda o maging kay Jun Singhot dahil sa tindi ng seguridad. Nakita na ng mata kung paano, magpahid ng alcohol ang mga lider na tumatakbo sa mataas na pwesto sa lipunan, higit ang bangit na lider ng bansa.

Nariyan ang pagkaumay sa usapan hinggil sa lider ng bansa ngunit hindi mabitawan dahil kailangan na ipagpatuloy na imulat ang tao sa laylayan upang pumili ng tama sa halalan. Ang nanggigising upang pumili ng maayos na lider ng bansa’y tunay na dapat pagsikapan hindi para makaupo para sa sariling layon. Ang mapabuti ang buhay ng nakararami higit ng tao sa laylayan ang ibig na makamit kahit may kailapan. Hindi magsasawang ilapit ang kaisipan na magmumulat sa mamamayan na pumili ng tama kahit ‘di tuwiran ang pakinabang. Matagal na ang paghihikahos ni Mang Juan, at ang patuloy na zarzuela ng mga nasa poder na mapanatili ang mga sarili sa ngalan ng serbisyong bayan ang gasgas na katotohanan na pinagkibit balikat ng Pinoy. Masakit sa puso at isip na patuloy ang panlililo ng tao sa itaas ng lipunan ngunit patuloy na tinatangkilik sa likod ng pansamantalang pakinabang.

Sa totoo lang, umay na ang maraming manunulat ngunit ‘di titigil ang grupo ng mga manunulat ng Police File’s Tonite na maghain ng mga balita’t impormasyon na magmumulat sa madlang Pinoy na mamili ng tamang lider na titimon sa kagalingan ng bayan. Ang pagkaumay ang gagamitin sangkalan sa laban sa hinaharap at patuloy na hihikayat ng marami pang mapangmulat na huwag itabi ang kaalaman. Ang tekada sa pagtipa ang gamit namin sa pagmumulat sa masang pinagmulan. Mabuhay ang Liping Mapagmahal sa Bayan..

Maraming Salamat po!!!!