QUIBOLOY ARESTADO NA, NAGTAGO SA BUNKER

NADAKIP na si Kingdom of Jesus Christ Pastor Apollo Quiboloy at hawak na ito ng mga alagad ng batas.

Ayon kay Department of Interior and Local Government (DILG) Secretary Benhur Abalos, ginagawa na ang angkop na proseso ng mga otoridad.

Matatandaang dalawang linggo nang hinahanap ito sa KOJC compound para isilbi ang warrant of arrest na inilabas ng Pasig City Reginal Trial Court.

Matatandaan na noong June 2024 unang isinilbi ang warrants para kay Quiboloy sa iba’t-ibang KOJC properties, ngunit hindi natagpuan ang pastor.

Noong July 2024, naglaan ng reward na P10 million para sa makapagtuturo ng kinaroroonan ng nagtatagong religious leader.
August 2024 naman nang maglabas ang Court of Appeals ng freeze order para sa mga bank accounts nito, kasama na ang ilang properties, sasakyan at aircraft.

Nitong unang linggo ng September 2024, sinabi ni Atty. Israelito Torreon na umalis si Quiboloy sa KOJC compound noon pang March 2024, pero hindi tinantanan ng Philippine National Police ang paghahanap sa pastor.

Umabot pa sila sa paghuhukay hanggang sa iba’t-ibang parte ng 30 ektaryang bakuran ng naturang samahan.

Samantala, pinuri ni Second Dist. Bukidnon Rep. Johnathan Keith Atty. John Flores ang pamunuan ng Philippine National Police (PNP) Davao Regional Office sa pagkaka-aresto sa puganteng lider ng Kingdom of Jesus Christ Pastor Apollo Quiboloy.

Ayon kay Rep. Flores, “No one is above the law. Not even a pastor claiming to be the Son of God, who just happens to be accused of horrendous crimes. He is not a martyr either. Pastor Quiboloy, his followers, allies, and protectors will falsely portray him as such.”

“A real Son of God has no need for an underground bunker and lair, nor for hordes of blinded followers,” dagdag pa ni Flores. (Cesar Barquilla)