2 dayuhan timbog sa P97m shabu sa NAIA

ARESTADO ang dalawang South Africans na nakumpiskahan ng halos 14 kilong shabu sa NAIA Terminal 3 itong madaling araw ng Biyernes, Enero 17, 2025.

Isinagawa ang operasyon ng NAIA International Airport Drug Interdiction Task Group (IADITG) matapos madiskubre ng Bureau of Customs x-ray inspector ang mga kahina-hinalang substansiya sa mga bagahe ng mga suspek. Sumunod ang isang K9 inspection na nagpatunay na mayroong mga iligal na droga.

Binuksan ng mga awtoridad ang mga bagahe at natagpuan ang shabu. Ang kabuuang bigat ng droga ay tinatayang 14,396 gramo na may halaga na P97,892,800.

Ayon sa mga nadakip, inimbitahan sila ng isang Nigerian na kaibigan mula sa South Africa para sa isang all-expenses-paid na biyahe patungong Pilipinas at iniutos sa kanila na makipagkita sa isa pang Nigerian pagdating nila.

Nakumpiska rin ng mga awtoridad ang mga cellular phone, dokumento ng paglalakbay, at mga identification card ng mga dayuhan, na nahaharap sa mga kasong walang piyansa.